පාකිස්තානයේ රාවල්පින්ඩි ක්රිකට් ක්රීඩාංගනයට එරෙහිව මෑතකදී පැනවූ දඩුවම් ලකුණ ඉවත් කිරීමට කටයුතු කළ බව ජගත් ක්රිකට් කවුන්සලය පවසනවා.
ඒ, පාකිස්තාන ක්රිකට් ආයතනය ඊට එරෙහිව ගොණු කළ අභියාචනයකින් පසුවයි.
පාකිස්තානය හා එංගලන්තය අතර පැවැති පළමු ටෙස්ට් ක්රිකට් තරගයෙන් අනතුරුව එම ක්රීඩාංගනයට එරෙහිව දඩුවම් ලකුණක් පැනවූයේ අදාළ තරගය සදහා යොදා ගත් රාවල්පින්ඩි ක්රීඩාංගනයේ තණතීරුව නියමිත ප්රමිතියට නොතිබූ (below average) බවට තරග තීරකවරයා විසින් තීරණය කිරීම හේතුවෙන්.
පාකිස්තාන – එංගලන්ත පළමු ටෙස්ට් ක්රිකට් තරගයේ දී පන්දු යවන්නන්ට යෝග්ය නොවන තණතීරුවක් නිර්මාණය කර තිබූ අතර, ඒ අනුව එංගලන්ත පළමු ඉනිමේ දී ලකුණු 657 ක් ද, පාකිස්තාන පළමු ඉනිමේ දී ලකුණු 579 ක් ද වාර්තා වුණා. කෙසේ වෙතත්, මෙම තරගයෙන් එංගලන්තය ලකුණු 74 ක ජයක් වාර්තා කළා.
ටෙස්ට් තරගයේ දර්ශන සමාලෝචනයට ලක් කිරීමෙන් පසුව අයි.සී.සී අභියාචනා මණ්ඩලය ඒකමතිකව තීරණය කර ඇත්තේ ක්රීඩාංගනයට එරෙහිව පැනවූ දඩුවම් ලකුණ ඉවත් කිරීමටයි.
මීට පෙර පසුගිය මාර්තු මාසයේ දී එම ක්රීඩාංගනයේ පැවැති පාකිස්තාන – ඔස්ට්රේලියා ටෙස්ට් තරගයෙන් පසුව ද තරගයට යොදා ගත් තණතීරුව නියමිත ප්රමිතියට නොතිබූ බවට තරග තීරකවරයා තීරණය කළ බැවින් දඩුවම් ලකුණක් ක්රීඩාංගනයට එරෙහිව පනවා තිබුණා.
