ලබන මාසයේ දී පාකිස්තානයේ සිදු කිරීමට නියමිතව තිබූ තරග සංචාරය අවලංගු කිරීමට එංගලන්ත ක්රිකට් ආයතනය තීරණය කර තිබෙනවා.
නවසීලන්ත කණ්ඩායම සිය පාකිස්තාන තරග සංචාරය පළමු එක්දින තරගය ආරම්භ වීමට මොහොතකට පෙර අවලංගු කිරීමට තීරණය කිරීමෙන් දින 3කට පසුවයි එංගලන්තය ද මෙම තීරණය අද(20) ගනු ලැබුවේ.
ආරක්ෂාව සම්බන්ධයෙන් ගැටලු සහගත තත්ත්වයක් පවතින බව පවසමින් නවසීලන්තය සිය සංචාරය අවලංගු කළා.
එම තීරණයත් සමගයි එංගලන්ත කණ්ඩායමේ පාකිස්තාන සංචාරය ද ගැටලු සහගත තත්ත්වයකට පත් වුණේ.
එංගලන්ත ක්රිකට් ආයතනයේ ද ආරක්ෂක උපදේශකයින් ලෙස කටයුතු කරන්නේ නවසීලන්ත ක්රිකට් ආයතනයේ ආරක්ෂක උපදේශකයින් ලෙස කටයුතු කරන ESI Security ආයතනයයි.
පාකිස්තාන තරග සංචාරයේ දී එංගලන්ත පිරිමි කණ්ඩායම 20යි 20 තරග දෙකකට ක්රීඩා කිරීමට නියමිතව තිබූ අතර, කාන්තා කණ්ඩායම 20යි 20 තරග දෙකකට හා එක්දින තරග 3කට ද ක්රීඩා කිරීමට නියමිතව තිබුණා.
20යි 20 තරග ඔක්තෝබර් 13 වනදා හා 14 වනදා පැවැත්වීමටයි නියමිතව තිබුණේ.
“අපගේ ක්රීඩකයින්ගේ සහ සහායක කාර්යය මණ්ඩලයේ මානසික හා ශාරීරික සුවතාවය අපගේ ඉහළම ප්රමුඛතාවය වන අතර අප දැනට ජීවත් වන කාලය තුළ මෙය වඩාත් තීරණාත්මකයි.” යනුවෙන් එංගලන්ත ක්රිකට් ආයතනය නිවේදනයක් නිකුත් කරමින් සදහන් කළා.
“කලාපය(පාකිස්තානය) තුළ සංචාරය කිරීම පිළිබඳව වැඩි වශයෙන් සැලකිලිමත් වෙමින් පවතින බව අපි දන්නවා. අපි විශ්වාස කරන්නේ මෙවැනි තත්ත්වයන් යටතේ සංචාරය කිරීම, පන්දුවාර විස්සයි 20 ලෝක කුසලානය සඳහා හොද සූදානමක් නොවනු ඇති බවයි”
කෙසේ වෙතත්, මෙම නිවේදනය තුළ ආරක්ෂක ගැටලු සම්බන්ධයෙන් විශේෂයෙන් සදහන් කර නැහැ.
එංගලන්ත පිරිමි කණ්ඩායම අවසන් වරට පාකිස්තානයේ සංචාරය කර ඇත්තේ 2005 වසරේදී යි.
කෙසේ වෙතත්, 2022 වසරේ දී පාකිස්තාන තරග සංචාරයක නිරත වීම සම්බනධයෙන් ද එංගලන්තය අවධානය යොමු කරන බවයි ඔවුන් නිකුත් කළ මාධ්ය නිවේදනයේ සදහන් වුණේ.
