සංචාරක ඔස්ට්රේලියානු කණ්ඩායම හා එංගලන්ත කණ්ඩායම අතර පැවැත්වෙන දෙවැනි අළුබදුන ටෙස්ට් ක්රිකට් තරගයේ පළමු දිනය මෙරට වේලාවෙන් ඊයේ(28) රාත්රියේ නිමා වුණා.
ඒ වන විට ලෝඩ්ස් ක්රීඩාංගනයේ දී පැවැත්වෙන මෙම තරගයේ කාසියේ වාසිය දිනූ එංගලන්තයේ ආරාධනයෙන් පළමුව පන්දුවට පහර දෙමින් සිටි ඔස්ට්රේලියාව කඩුලු 5ක් දැවී ලකුණු 339 ක් ලබා සිටියා.
නොදැවී පන්දුවට පහර දෙමින් සිටින ස්ටීවන් ස්මිත් ලකුණු 85 ක් හා ඇලෙක්ස් කෙරී ලකුණු 11 ක් ලබා කඩුල්ලේ රැදී සිටිනවා.
ඔස්ට්රේලියානු ඉනිම ආරම්භ කළේ ඩේවිඩ් වෝනර් සමගින් උස්මාන් කවාජා. ඔවුන් දෙදෙනා අතර පළමු කඩුල්ලට ලකුණු 73 ක සම්බන්ධතාවයක් ගොඩ නැගුණා. කවාජා ලකුණු 17 කට දැවී ගියේ ජොෂ් ටොන්ග්ගේ පන්දුවක් හමුවේයි. පන්දුව නිදැල්ලේ යැවීමට ගත් උත්සාහයකදී එය කෙළින්ම කඩුල්ලේ වැදීම හේතුවෙන් කවාජා දැවී ගියා.
අනතුරුව වෝනර් ලකුණු 66 ක් ලබා සිටියදී දැවී ගියේ ද ටොන්ග්ගේ සුපිරි පන්දුවක් කෙළින්ම කඩුල්ලේ වැදීමෙන්. පන්දු 88 කින් වාර්තා වූ වෝනර්ගේ ඉනිමට හයේ පහරක් හා හතරේ පහර 8ක් ඇතුළත්.
තෙවැනි කඩුල්ල සදහා මර්නස් ලබුෂේන් හා ස්ටීවන් ස්මිත් අතර ලකුණු 102 (155) ක සම්බන්ධතාවයක් ගොඩ නැගුණු අතර, එම සබදතාවය බිද වැටුණේ ඔලී රොබින්සන්ගේ පන්දුවක් හමුවේ මර්නස් ලබුෂේන් ලකුණු 47 කට දැවී යාමත් සමගයි.
සිව්වැනි කඩුල්ල සදහා ස්මිත් හා ට්රැවිස් හෙඩ් ලකුණු 118 (122) ක වේගවත් සම්බන්ධතාවයක් ගොඩ නැගුවා. හෙඩ් පන්දු 73 කින් ලකුණු 77 ක් ලබා ගත්තා. ජෝ රූට්ගේ පන්දුවක් හමුවේ ස්ටම්ප් කිරීමකට හසුව ඔහු දැවී ගිය අතර, එම පන්දුවාරයේ දී ම කැමරන් ග්රීන් ද ලකුණු නොලබා සිටියදී දැවී ගියා.
