ශ්රී ලංකා ක්රිකට් කණ්ඩායමට ජගත් ක්රිකට් කවුන්සලය විසින් දඩ නියම කර තිබෙනවා.
ඒ, ඉන්දීය කණ්ඩායම සමග පසුගිය 20 වැනිදා කොළඹ පැවැති දෙවැනි එක්දින ක්රිකට් තරගයේ දී නියමිත කාලයට පන්දුවාර 50 යවා නිම නොකිරීම හේතුවෙන්.
දසුන් ශානකගේ නායකත්වයෙන් යුත් ශ්රී ලංකා කණ්ඩායමට නියමිත කාලය තුළ එක් පන්දුවාරයක් යවා නිමා කිරීමට හැකියාව ලැබී තිබුණේ නැහැ.
ඒ අනුව සියලු ක්රීඩකයින්ට තරග ගාස්තුවෙන් 20%ක දඩ මුදලක් පැනවීමටයි තරග තීරකවරයා ලෙස කටයුතු කළ රංජන් මඩුගල්ල මහතා පියවර ගෙන ඇත්තේ.
ඊට අමතරව මෙම වරද හේතුවෙන් අයි.සී.සී ක්රිකට් ලෝක කුසලාන සුපර් ලීගයේ ප්රසාද ලකුණු සටහනෙන් ශ්රී ලංකා කණ්ඩායමට තවත් ප්රසාද ලකුණක් අහිමි කිරීමට ජගත් ක්රිකට් කවුන්සලය පියවර ගෙන තිබෙනවා.
ඒ අනුව ශ්රී ලංකාවට සුපර් ලීගය යටතේ මේ වන විට හිමිව ඇත්තේ ප්රසාද ලකුණු 12ක් පමණයි.
සුපර් ලීගය යටතේ ශ්රී ලංකාව තරග 11කට ක්රීඩා කර ඉන් එක් ජයක් පමණක් ලබා මේ වන විට 12 වන ස්ථානයේ රැදී සිටිනවා.
මීට පෙර ද පන්දුවාර යැවීමට වැඩි කාලයක් ලබා ගැනීමේ වරද හේතුවෙන් ශ්රී ලංකාවෙන් ප්රසාද ලකුණු 2ක් කපා හැරුණා.
නායක දසුන් ශානක වරද පිළිගනිමින් ලබා දී ඇති දඩුවම පිළිගෙන ඇති බවත්, එබැවින් මෙම සිද්ධිය සම්බන්ධයෙන් වැඩිදුර විභාගයක් සිදු නොවන බවත් ජගත් ක්රිකට් කවුන්සලය නිවේදනය කළා.
