නෙදර්ලන්තය සමග පැවැත්වෙන තරග 3කින් යුත් එක්දින ක්රිකට් තරගාවලියේ පළමු තරගයෙන් ඩක්වර්ත් ලුවිස් න්යාය යටතේ කඩුලු 7ක ජයක් වාර්තා කිරීමට සංචාරක බටහිර ඉන්දීය කොදෙව් කණ්ඩායම සමත් වුණා.
නෙදර්ලන්තයේ Amstelveen හී දී පැවැති තරගයේ කාසියේ වාසිය දිනූ කොදෙව්වන් පළමුවෙන් පන්දු රැකීමටයි තීරණය කළේ.
ඒ අනුව පිටියට පිවිසි නෙදර්ලන්ත කණ්ඩායම පන්දුවට පහර දෙමින් සිටින අතරවාරයේ දී තරගයට වර්ෂාවෙන් බාධා එල්ල වූ බැවින් එක් ඉනිමක් පන්දුවාර 45කට සීමා කෙරුණා.
නෙදර්ලන්තය නියමිත පන්දුවාර 45 අවසන් කළේ කඩුලු 7ක් දැවී ලකුණු 240ක් ලබා ගනිමින්.
Teja Nidamanuru නොදැවී ලකුණු 58ක් රැස් කළ අතර, Vikramjit Singh ලකුණු 47යි.
පන්දු යැවීමේ දී ක්යල් මේයර්ස් හා අකීල් හොසේන් කඩුලු 2 බැගින් බිද හෙලුවා.
පිළිතුරු ඉනිම ක්රීඩා කළ කොදෙව්වන් ඉනිම නිමා වීමට පන්දු 11ක් ඉතිරිව තිබියදී ඩක්වර්ත් ලුවිස් න්යාය යටතේ තමන්ට හිමි වූ ලකුණු 247ක ඉලක්කය පසු කර ගියේ කඩුලු 3ක් දැවී සිටියදීයි.
ෂේයි හෝප් නොදැවී ලකුණු 119ක් රැස් කළේ පන්දු 130කින්. ඒ, හයේ පහර 2ක් හා හතරේ පහර 12ක් සමගින්.
ශමාර් බෘක්ස් ලකුණු 60ක් ද, බ්රෙන්ඩන් කිං නොදැවී ලකුණු 58ක් ද ලබා ගනිමින් කොදෙව් ඉනිම ශක්තිමත් කළා.
