ඉන්දීය පන්දු යවන්නන්ගේ දක්ෂතා හා සංජු සැම්සන්ගේ නොදැවුණු ඉනිම හේතුවෙන් සිම්බාබ්වේ කණ්ඩායම සමග පැවැත්වෙන තරග 3කින් යුත් එක්දින ක්රිකට් තරගාවලියේ දෙවැනි තරගයෙන් කඩුලු 5ක ජයක් වාර්තා කරමින් තරගාවලිය තරගයක් ඉතිරිව තිබියදීම ජය ගැනීමට සංචාරක ඉන්දීය කණ්ඩායම අද(20) සමත් වුණා.
හරාරේ හී දී පැවැති තරගයේ කාසියේ වාසිය දිනූ ඉන්දීය පිලේ ආරාධනයෙන් පළමුව පන්දුවට පහරදුන් සිම්බාබ්වේ කණ්ඩායමට මෙම තරගයේ දී ද සාර්ථක පිතිහරඹයක නිරත වීමට ඉන්දීය පන්දු යවන්නන්ගෙන් ඉඩ ලැබුණේ නැහැ.
ඒ අනුව සිම්බාබ්වේ ඉනිම පන්දුවාර 38.1 ක් අවසානයේ දී සියලු දෙනා දැවී සටහන් වුණේ ලකුණු 161 ක් ලෙසයි.
ෂෝන් විලියම්ස් ලකුණු 42 ක් ද, Ryan Burl නොදැවී ලකුණු 39 ක් ද රැස් කළා.
පන්දු යැවීමේ දී ඉන්දියාව වෙනුවෙන් ශර්දුල් තාකූර් ලකුණු 38 කට කඩුලු 3ක් බිද හෙලුවා. මොහමඩ් සිරාජ්, ප්රසිද් ක්රිෂ්නා, අක්සාර් පටෙල්, කුල්දීප් යාදව් හා දීපක් හූදා කඩුල්ල බැගින් දවා ගත්තා.
පිළිතුරු ඉනිම ක්රීඩා කළ ඉන්දීය කණ්ඩායමට යම් අභියෝගයක් එල්ල කිරීමට සිම්බාබ්වේ පන්දු යවන්නන් සමත් වුවත්, තරගයේ ජයග්රහනය සදහා එය කිසිසේත් ප්රමාණවත් වූයේ නැහැ.
ඉන්දියාව පන්දුවාර 25.4 ක් අවසානයේ කඩුලු 5 ක් දැවී ජයග්රාහී ඉලක්කය පසු කළා.
කේ.එල් රාහුල් එක් ලකුණකටත්, ඉෂාන් කිෂන් ලකුණු 6කටත් දැවී ගියා. ශිකර් ධවාන් හා ෂුබ්මන් ගිල් ලකුණු 33 බැගින් ලබා ගත් අතර, දීපක් හූදා ලකුණු 25 ක් ලබා ගත්තා.
සංජු සැම්සන් පන්දු 39 කින් ලකුණු 43 ක් නොදැවී රැස් කළේ හයේ පහර 4 ක් හා හතරේ පහර 3ක් සමගින්.
පන්දු යැවීමේ දී Luke Jongwe ලකුණු 33කට කඩුලු 2 ක් බිද හෙලුවා.
