එංගලන්තය සමග පැවැත්වීමට නියමිත දෙවැනි ටෙස්ට් ක්රිකට් තරගය ක්රීඩා කිරීමේ අවස්ථාව ඉන්දීය දග පන්දු යවන ක්රීඩක රවීන්ද්ර ජඩේජාට හා මැදපෙල පිතිකරු කේ එල් රාහුල්ට අහිමි වී තිබෙනවා.
හයිදරාබාද් හී දී පැවැති පළමු ටෙස්ට් තරගයේ සිව්වැනි දිනයේ දී ජඩේජා පාදයක ආබාධයකට ලක් වූ අතර, රාහුල්ගේ දකුණු පාදයේ ද යම් වේදනාවක් හට ගෙන ඇති බවයි ඉන්දීය ක්රිකට් පාලක මණ්ඩලය නිවේදනය කළේ.
ඒ අනුව මැදපෙල පිතිකරුවෙකු වන සර්ෆරාස් ඛාන් හා වමත් දග පන්දු යවන ක්රීඩක සවුරාබ් කුමාර් මෙන්ම තුන් ඉරියව් ක්රීඩක වොෂින්ටන් සුන්දර් ඉන්දීය ටෙස්ට් සංචිතයට ඇතුළත් කිරීමට පියවර ගෙන තිබෙනවා.
පළමු පෙල කඩුලු 290 ක උරුමකරුවෙකු වන සවුරාබ් කුමාර් මීට පෙර 2022 වසරේ දී බංග්ලාදේශ සංචාරය සදහා වන ඉන්දීය ටෙස්ට් සංචිතයට නම් කර තිබුණ ද ඔහුට මෙතෙක් ටෙස්ට් වරම් දිනා ගැනීමට හැකියාව ලැබී නැහැ.
පළමු පෙල තරග 45 කට ක්රීඩා කර ඉනිමක සාමාන්ය 70 ක් ලෙස සටහන් කර ගෙන ඇති සර්ෆරාස් ඛාන් ද මෙතෙක් ටෙස්ට් වරම් හිමි කර ගෙන නැහැ.
කෙසේ වෙතත්, පළමු ටෙස්ට් තරගයේ ඉන්දීය පළමු ඉනිමේ දී ලකුණු 86 ක් ලබා ගත් කේ එල් රාහුල් වෙනුවට දෙවැනි ටෙස්ට් තරගය සදහා මෙතෙක් ටෙස්ට් වරම් දිනා නොමැති රාජත් පටිදර් ආදේශ කිරීමට ඉඩ පවතිනවා. පටිදර් සංචියට ආදේශ කෙරුණේ විරාත් කෝලි පළමු ටෙස්ට් තරග දෙකෙන් ඉවත් වීමට ගත් තීරණය හේතුවෙන්.
ජඩේජා පළමු ටෙස්ට් තරගයේ දී පන්දු යැවීමෙන් කඩුලු පහක් හා පිතිකරණයෙන් පිළිවෙලින් ලකුණු 87 ක් හා 02 ක් රැස් කළා. ඔහු වෙනුවට දෙවැනි ටෙස්ට් තරගය සදහා කුල්දීප් යාදව් හෝ වොෂින්ටන් සුන්දර් කැදවීමට ඉඩ පවතිනවා.
පළමු තරගය ජය ගත් එංගලන්තය දෙරට අතර පැවැත්වෙන තරග 5කින් යුත් ටෙස්ට් තරගාවලිය මේ වන විට තරග 1-0 ක් ලෙස පෙරමුණ හිමි කර ගෙන සිටින අතර, දෙවැනි තරගය එළඹෙන දෙවැනිදා විසාකාපට්නම් හී දී ආරම්භ වීමට නියමිතයි.
India’s squad for second Test against England
Rohit Sharma (C), Shubman Gill, Yashasvi Jaiswal, Shreyas Iyer, KS Bharat (WK), Dhruv Jurel (WK), Ravichandran Ashwin, Axar Patel, Kuldeep Yadav, Mohd. Siraj, Mukesh Kumar, Jasprit Bumrah (VC), Avesh Khan, Rajat Patidar, Sarfaraz Khan, Washington Sundar, Saurabh Kumar.
