දකුණු අප්රිකාවේ පැවැත්වීමට නියමිත නවතම පන්දුවාර 20යි 20 ලීග් ක්රිකට් තරගාවලිය වන SA20 තරගාවලිය සදහා ක්රීඩා කිරීමට ශ්රී ලංකා දග පන්දු යවන ක්රීඩක අකිල ධනංජය ගිවිසුම්ගත වී තිබෙනවා.
ඔහු සිය කණ්ඩායම සමග ගිවිසුම්ගතව ඇති බවයි ඩර්බන්ස් සුපර් ජයන්ට්ස් කණ්ඩායම නිවේදනය කළේ.
වයිල්ඩ්කාඩ් (wildcard) ක්රමවේදය යටතේ එම කණ්ඩායම ඔහු සමග ගිවිසුම්ගත වී තිබෙනවා.
ඒ අනුව ජනවාරි 10 වැනිදා සිට පෙබරවාරි 11 වැනිදා දක්වා පැවැත්වීමට නියමිත SA20 තරගාවලිය සදහා ක්රීඩා කිරීමට නියමිත ශ්රී ලංකා ක්රීඩකයින් ගණන 4ක් දක්වා ඉහළ ගොස් තිබෙනවා.
මීට පෙර තරගාවලියේ ක්රීඩක වෙන්දේසියේ දී ශ්රී ලංකා ක්රීඩකයින් දෙදෙනෙකු මිලදී ගැනීමට කණ්ඩායම් දෙකක හිමිකරුවන් කටයුතු කළා.
ශ්රී ලංකා නවක වේග පන්දු යවන ක්රීඩක ඩිල්ෂාන් මදුෂංක මිලදී ගැනීමට සමත් වුණේ ද ඩර්බන්ස් සුපර් ජයන්ට්ස් කණ්ඩායමයි.
ඔහු දකුණු අප්රිකානු රැන්ඩ් 275,000 ක මුදකට අලෙවි වුණා. ශ්රී ලංකා මුදලින් එය රුපියල් මිලියන 5.7 ක පමණ අගයක්.
ශ්රී ලංකා 20යි 20 කණ්ඩායමේ ආරම්භක පිතිකරු කුසල් මෙන්ඩිස් ප්රෙටෝරියා කැපිටල්ස් කණ්ඩායම විසින් මිලදී ගත්තේ දකුණු අප්රිකානු රැන්ඩ් 425,000 ක මුදලකටයි. ශ්රී ලංකා මුදලින් එය රුපියල් මිලියන 8.9 ක පමණ අගයක්.
ක්රීඩක වෙන්දේසියට පෙර ශ්රී ලංකා දග පන්දු යවන ක්රීඩක මහීෂ් තීක්ෂණ ජොහැනස්බර්ග් සුපර් කිංග්ස් කණ්ඩායම සමග ගිවිසුම්ගත වී තිබුණා.
