2024 කාන්තා ප්රිමියර් ලීග් (WPL) ක්රිකට් තරගාවලියේ ක්රීඩිකාවන් වෙන්දේසිය සදහා ඉදිරිපත් කෙරෙන ක්රීඩිකාවන්ගේ නම් අද(2) තරගාවලියේ සංවිධායකයින් විසින් නිවේදනය කළා.
ක්රීඩිකාවන් 165 දෙනෙකු වෙන්දේසිය සදහා ඉදිරිපත් කෙරෙන අතර, ඉන් ක්රීඩිකාවන් 104 දෙනෙකු ඉන්දීය ක්රීඩිකාවන් වනවා.
61 දෙනෙකු විදෙස් ක්රීඩිකාවන් වන අතර, ඉන් 15 දෙනෙකු අයි.සී.සී පූර්ණ සාමාජික නොවන රටවල ක්රීඩිකාවන් බව තරගාවලියේ සංවිධායකයින් නිවේදනය කර තිබෙනවා.
ජාත්යන්තර වරම් දිනූ ක්රීඩිකාවන් 56 දෙනෙකු හා ජාත්යන්තර වරම් දිනා නොමැති ක්රීඩිකාවන් 109 දෙනෙකු වෙන්දේසියට ඉදිරිපත් වූ ක්රීඩිකාවන් අතරට ඇතුළත්.
කණ්ඩායම් 5 විසින්ම වෙන්දේසියේ දී උපරිම වශයෙන් ක්රීඩිකාවන් 30 දෙනෙකු මිලදී ගැනීමට නියමිතයි. මේ වන විට එම කණ්ඩායම්වල විදෙස් ක්රීඩිකාවන් 9 දෙනෙකුගේ පුරප්පාඩුවක් ද පවතිනවා.
ක්රීඩිකාවක් වෙන්දේසියට ඉදිරිපත් කෙරෙන ඉහළම මූලික වටිනාකමක් හිමි කාණ්ඩය වන්නේ ඉන්දීය රුපියල් ලක්ෂ 50 ක කාණ්ඩයයි.
එම කාණ්ඩය යටතේ කොදෙව් ක්රීඩිකා Deandra Dottin හා ඔස්ට්රේලියාවේ Kim Garth ලියාපදිංචි වී තිබෙනවා.
ඉන්දීය රුපියල් ලක්ෂ 40 ක මූලික වටිනාකමක් හිමි කාණ්ඩය යටතේ ලියාපදිංචි වී ඇති ක්රීඩිකාවන් ප්රමාණය 4 ක්.
මෙවර කාන්තා බිග් බෑෂ් ලීග් තරගාවලියේ දී ඉහළ දක්ෂතා දැක් වූ ශ්රී ලංකා නායිකා චමරි අතපත්තු ඉන්දීය රුපියල් ලක්ෂ 30 ක කාණ්ඩයෙන් ලියාපදිංචි වී තිබෙනවා. ඇය පසුගිය WPL වෙන්දේසියේ දී කිසිදු කණ්ඩායමක් විසින් මිලදී ගත්තේ නැහැ.
ශ්රී ලංකාවේ ඉනෝකා රණවීර ලියාපදිංචි වී ඇත්තේ ද ඉන්දීය රුපියල් ලක්ෂ 30 ක මූලික වටිනාකමක් හිමි කාණ්ඩය යටතේයි.
WPL දෙවැනි අදියරේ ක්රීඩිකාවන් වෙන්දේසිය ලබන 9 වැනිදා මුම්බායි හී දී පැවැත්වීමට නියමිතයි.
