ක්රිකට් වාර්තා රැසකට හිමිකම් කියන ඉන්දීය හිටපු සුපිරි පිතිකරු සචින් තෙන්ඩුල්කාර් පිළිබද මේ දිනවල යළි වැඩි අවධානයක් යොමුව තිබෙනවා.
ඒ, ඔහුගේ පුත් අර්ජුන් තෙන්ඩුල්කාර් මෙවර ඉන්දීය ප්රිමියර් ලීග් ක්රිකට් තරගාවලිය යටතේ පසුගිය 16 වැනිදා පැවැති තරගයේ දී අයි.පී.එල් වරම් දිනා ගැනීමත් සමගයි.
සිය පියා සුපිරි පිතිකරුවෙකු වුවත්, අර්ජුන් තෙන්ඩුල්කාර් වමත් වේග පන්දු යවන්නෙකු ලෙසයි ක්රීඩා කරන්නේ.
සිය පළමු අයි.පී.එල් තරගයේ දී ඔහු පන්දුවාර 2ක් යොමු කළ නමුත්, කිසිදු කඩුල්ලක් දවා ගැනීමට ඔහුට හැකි වූයේ නැහැ.
කෙසේ වෙතත්, ඊයේ(18) සන්රයිසස් හයිදරාබාද් කණ්ඩායම සමග පැවැති තරගයේ දී පන්දුවාර 2.5 ක් යොමු කරමින් සිය මංගල අයි.පී.එල් කඩුල්ල බිද හෙලීමට අර්ජුන් තෙන්ඩුල්කාර් සමත් වුණා.
ඔහුගේ මංගල අයි.පී.එල් කඩුල්ල ලෙස බුවනේෂ්වර් කුමාර් දැවී ගියේ සන්රයිසස් ඉනිමේ අවසන් කඩුල්ල ලෙසයි.
ලකුණු 193 ක ඉලක්කයක් හඹා ගිය සන්රයිසස් හයිදරාබාද් ඉනිමේ අවසන් පන්දුවාරය යොමු කිරීමේ අභියෝගය අර්ජුන්ට පැවරුණු අතර, මුම්බායි පිලට ජය හිමි කර දීමටනම් එම පන්දුවාරයේ දී ලකුණු 20 ක් ආරක්ෂා කර ගැනීමේ අභියෝගය ඔහුට පැවරුණා.
අවසන් පන්දුවාරයේ දී ප්රතිවාදීන් රැස් කළේ ලකුණු 5 ක් පමණයි. අවසන් පන්දුවාරයේ 5 වැනි පන්දුවේ දී යි බුවනේෂ්වර් දැවී ගියේ. ඒ අනුව මුම්බායි පිලට ලකුණු 14 ක ජයක් මෙම තරගයෙන් හිමි වුණා.
සචින් තෙන්ඩුල්කාර් සිය ජාත්යන්තර ක්රිකට් දිවියේ දී කඩුලු 201 ක් දවා ගැනීමට සමත්ව තිබුණා. කෙසේ වෙතත්, අයි.පී.එල් තරග 78 ක් ක්රීඩා කර තිබුණ ද සචින් කිසිදු කඩුල්ලක් දවා ගැනීමට සමත්ව තිබුණේ නැහැ.
අර්ජුන් තෙන්ඩුල්කාර් බිද හෙලූ සිය මංගල අයි.පී.එල් කඩුල්ල පහතින් නරඹන්න –
A special moment for young Arjun Tendulkar, who gets his first wicket in #TATAIPL and it is his captain Rohit Sharma, who takes the catch of Bhuvneshwar Kumar.
Arjun takes the final wicket and @mipaltan win by 14 runs. pic.twitter.com/1jAa2kBm0Z
— IndianPremierLeague (@IPL) April 18, 2023
