ජගත් ක්රිකට් කවුන්සලයේ (අයි.සී.සී) වාර්ෂික සමුළුව අද (19) සිට 22 වැනිදා දක්වා කොළඹ දී පැවැත්වීමට නියමිතව තිබෙනවා.
ලොව පුරා එනම්, අප්රිකාව, ඇමෙරිකාව, ආසියාව, නැගෙනහිර ආසියා පැසිෆික් හා යුරෝපය යන කලාප නියෝජනය කරන අයි.සී.සී සාමාජිකත්වය සහිත රටවල් 108 ක නියෝජිතයින් 220 දෙනෙකුට වඩා වැඩි පිරිසක් මෙම සමුළුව සදහා එක්වීමට නියමිතයි.
නිමා වූ පන්දුවාර විස්සයි 20 ලෝක කුසලාන ක්රිකට් තරගාවලිය සම්බන්ධයෙන් හා ඇමෙරිකා එක්සත් ජනපදයේ ක්රිකට් ආයතනයේ පරිපාලන ගැටලු සම්බන්ධයෙන් ද මෙම අයි.සී.සී සමුළුවේ දී අවධානය යොමු කිරීමට නියමිතව තිබෙනවා.
2024 විස්සයි 20 ලෝක කුසලාන තරගාවලිය ඇමෙරිකාවේ දී හා බටහිර ඉන්දීය කොදෙව් දූපත්හීදී පැවැති අතර, එහි ඇමෙරිකානු අදියරෙන් ඩොලර් මිලියන ගණනක අලාභයක් අයි.සී.සීයට සිදුව ඇති බවටයි අපේක්ෂා කෙරෙන්නේ.
ඇතැම් වාර්තාවලට අනුව ඉන්දීය රුපියල් කෝටි 160 කට අධික (ශ්රී ලංකා මුදලින් රුපියල් කෝටි 583 කට අධික) අලාභයක් අයි.සී.සීයට සිදුව ඇති බව සදහන්.
තරගාවලිය පැවැත්වීම සදහා නිව්යෝර්ක් නුවර නව ක්රීඩාංගනයක් ද ඉදි කිරීමට සිදු වූ අතර, ඒ සදහා පමණක් ඇමෙරිකානු ඩොලර් මිලියන 30 ක පමණ මුදලක් අයි.සී.සීයට වැය වී තිබුණා.
ඇමෙරිකානු අදියර වෙනුවෙන් ජගත් ක්රිකට් කවුන්සලය පළමුව ඇමෙරිකානු ඩොලර් මිලියන 40-50 ක පමණ මුදලක් සදහා අනුමැතිය ලබා දී තිබූ බවයි වාර්තා වන්නේ.
ඉන් ඩොලර් මිලියන 15 ක් මෙහෙයුම් වියදම් සඳහා ද, ඩොලර් මිලියන 30 ක් පමණ නිව් යෝර්ක් හි ඉදි කෙරුණු තාවකාලික ක්රීඩාංගනයේ ඉදි කිරීම් කටයුතු සදහා ද යොදා ගැනීමට ඇස්තමේන්තුගත කර තිබුණා.
කෙසේ වෙතත්, ලෝක කුසලානයේ ඇමෙරිකානු අදියර ක්රියාත්මක කිරීම වෙනුවෙන් ICC හි වාණිජ අංශය වන IBC විසින් නිර්මාණය කරන ලද එක්සත් ජනපදය පදනම් කරගත් ආයතනයක් වන T20 World Cup USA Inc විසින් තරගාවලිය ආරම්භ වීමට ඉතා ආසන්නව තිබියදී තවත් ඩොලර් මිලියන 20 ක මුදලක් අවශ්ය බවට ඉල්ලීමක් සිදු කර තිබූ බව සදහන්.
මේ අතර, ඇමෙරිකානු ක්රිකට් ආයතනයේ පරිපාලනය පිළිබදව ද මෑතක සිට ගැටලු මතුව තිබූ අතර, ඒ සම්බන්ධයෙන් ද සාකච්ඡා කර අවශ්ය තීන්දු තීරණ අයි.සී.සී සමුළුව අතුරතුර දී ගැනීමට නියමිතයි.
ලොව පුරා සිටින ක්රිකට් පරිපාලකයින්ගේ සහ පාර්ශවකරුවන්ගේ උසස්ම රැස්වීම වන ICC වාර්ෂික සමුළුව ක්රීඩාවේ උපාය මාර්ගික දිශානතිය, පාලනය සහ ලොව පුරා ක්රිකට් සංවර්ධනය පිළිබඳ සාකච්ඡා සිදු කිරීම සඳහා වේදිකාවක් නිර්මාණය කරනු ලබනවා.
2028 ඔලිම්පික් ක්රීඩා උළෙලට ක්රිකට් ක්රීඩාව ඇතුළත් කර ඇති පසුබිමක “ඔලිම්පික් අවස්ථාවෙන් ප්රයෝජන ගැනීම” යන තේමාව යටතේ මෙවර සමුළුව පැවැත්වෙන බව සදහන්.
වාර්ෂික සමුළුව යටතේ ප්රධාන රැස්වීම් කිහිපයක් මෙන්ම වැඩමුළු ද පැවැත්වීමට නියමිතව ඇති අතර, ක්රීඩාවේ අනාගතය වෙනුවෙන් වැදගත් තීරණ රැසක් ද මෙහිදී ගැනීමට නියමිතයි.
