2026 ඉන්දීය ප්රිමියර් ලිග් ක්රිකට් තරගාවලියට පෙර සියලු කණ්ඩායම් විසින් සිය සංචිතවල රදවා ගන්නා හා නිදහස් කරන ක්රීඩකයින් ලැයිස්තුව අද ප්රකාශයට පත් කළා.
ඒ සදහා පස්වරු 3 දක්වා කල් ලබා දී තිබූ අතර, මේ වන විට ඒ ඒ කණ්ඩායම් රදවා ගත් හා නිදහස් කළ ක්රීඩකයින් ලැයිස්තු මාධ්යයට නිවේදනය කර තිබෙනවා.
ඒ අනුව පසුගිය අයි.පී.එල් තරගාවලිය සදහා එක් වූ ශ්රී ලංකා ක්රීඩකයින් 10 දෙනාගෙන් එළඹෙන තරගාවලිය වෙනුවෙන් සිය සංචිතවල රදවා ගැනීමට තීරණය කර ඇත්තේ ශ්රී ලංකා ක්රීඩකයින් 4 දෙනෙකු පමණයි.
චෙන්නායි සුපර් කිංග්ස් කණ්ඩායම විසින් මතීෂ පතිරණ සංචිතයෙන් නිදහස් කර තිබෙනවා.
දුෂ්මන්ත චමීර තවදුරටත් සංචිතයේ රදවා ගැනීමටයි දිල්ලි කැපිටල්ස් කණ්ඩායම පියවර ගෙන ඇත්තේ.
සන්රයිසස් හයිදරාබාද් කණ්ඩායම විසින් කමිදු මෙන්ඩිස් හා ඒෂාන් මාලිංග සංචිතයේ රදවා ගෙන තිබෙනවා.
රෝයල් චැලෙන්ජර්ස් බැංගලූරු කණ්ඩායම නුවන් තුෂාර සංචිතයේ රදවා ගැනීමටයි තීරණය කර ඇත්තේ.
රාජස්ථාන් රෝයල්ස් කණ්ඩායම නියෝජනය කළ මහීෂ් තීක්ෂණ හා වනිදු හසරංග සංචිතයෙන් නිදහස් කර තිබෙනවා.
ගුජරාට් ටයිටන්ස් සංචිතය සදහා ඇතුළත්ව සිටි දසුන් ශානක හා කුසල් මෙන්ඩිස් ද සංචිතයෙන් නිදහස් කර ඇති අතර, මුම්බායි ඉන්දියන්ස් සංචිතයට එක් වූ චරිත් අසලංක ද රදවා ගත් ක්රීඩක ලැයිස්තුවට ඇතුළත්ව නැහැ.
