ශ්රී ලංකා, ඉන්දීය හා දකුණු අප්රිකා කාන්තා කණ්ඩායම් ක්රීඩා කරන තුන්කොන් එක්දින ක්රිකට් තරගාවලිය හෙට(27) ආරම්භ වනවා.
පළමු තරගය කොළඹ ආර්. ප්රේමදාස ක්රීඩාංගනයේදී ශ්රී ලංකාව හා ඉන්දියාව අතර පැවැත්වීමට නියමිත අතර, එම තරගය පෙරවරු 10 ට ආරම්භ වීමට නියමිතයි.
තරගාවලියේ මූලික වටයේ දී ශ්රී ලංකාව ක්රීඩා කරන දෙවැනි තරගය මැයි දෙවැනිදා දකුණු අප්රිකාවට එරෙහිවත්, තෙවැනි තරගය මැයි 4 වැනිදා ඉන්දියාවට එරෙහිවත්, සිව්වැනි තරගය මැයි 9 වැනිදා දකුණු අප්රිකාවට එරෙහිවත් පැවැත්විමට නියමිතව තිබෙනවා.
තරගාවලියේ අවසන් මහා තරගය පැවැත්වෙන්නේ ලබන 11 වැනිදායි.
තරගාවලියේ ශූරතා කුසලානය එළිදැක්වීමේ අවස්ථාව හා නිල මාධ්ය හමුව අද කොළඹදී පැවැත්වුණා.
මාධ්ය හමුවේදී අදහස් දැක් වූ ශ්රී ලංකා නායිකා චමරි අතපත්තු කියා සිටියේ කාන්තා එක්දින ලෝක කුසලාන තරගාවලියට පෙර ශ්රී ලංකා ක්රීඩිකාවන්ට මෙම තරගාවලිය ක්රීඩා කිරීමට ලැබීම අතිශය ප්රයෝජනවත් වන බවයි.
දකුණු අප්රිකා නායිකා ලෝරා වොල්වාර්ඩ්ට්ගේ 26 වැනි උපන් දිනය ද අද දිනයට යෙදී තිබූ අතර, ඇය ශ්රී ලංකා නායිකාව හා ඉන්දීය නායිකාව සමග එක්ව ප්රේමාදාස ක්රීඩාංගනයේදී උපන් දිනය සැමරීම ද විශේෂත්වයක්.
මේ අතර, මෙම තරගාවලියට ක්රීඩා කරන ශ්රී ලංකා සංචිතයට ක්රීඩිකාවන් 17 දෙනෙකු ඇතුළත්. එම සංචිතයට මෙතෙක් එක්දින වරම් දිනා නොමැති ක්රීඩිකාවන් සිව් දෙනෙකු ද නම් කර තිබෙනවා. එනම් මල්කි මදාරා, දෙව්මි විහංගා, රශ්මිකා සෙව්වන්දි හා පියුමි වත්සලා යන ක්රීඩිකාවන්.
ඉනෝකා රණවීර, හසිනි පෙරේරා හා හන්සිමා කරුණාරත්න යළි සංචිතයට කැදවා ඇත්තේ ඉමේෂා දුලානි, සචිනි නිසංසලා, කෞෂිණී නුත්යංගනා, චේතනා විමුක්ති හා ආබාධයට ලක්ව සිටින උදේශිකා ප්රබෝදනී සංචිතයෙන් ඉවත් කරමින්.
Sri Lanka squad for women’s ODI tri-series
Chamari Athapaththu (c), Harshitha Samarawickrama, Vishmi Gunaratne, Nilakshika Silva, Kavisha Dilhari, Anushka Sanjeewani (wk), Manudi Nanayakkara, Hasini Perera, Achini Kulasuriya, Piumi Badalge, Dewmi Vihanga, Hansima Karunaratne, Malki Madara, Inoshi Priyadarshini, Sugandika Kumari, Rashmika Sewwandi, Inoka Ranaweera
