මැතිව්ස්ගේ සුපිරි ශතකය හමුවේ ලෝක වාර්තාවක් සමග කොදෙව්වන් ඔස්ට්‍රේලියාව පරදවයි

Hayley Matthews ගේ අනර්ඝ පිතිහරඹය හමුවේ ඔස්ට්‍රේලියාව පරදා, කාන්තා පන්දුවාර 20යි 20 ක්‍රිකට් ඉතිහාසයේ දී හඹා ගොස් කණ්ඩායමක් තරගයක් ජය ගත් ඉහළ ලකුණු සංඛ්‍යාවේ ලෝක වාර්තාව බිද දැමීමට සංචාරක බටහිර ඉන්දීය කොදෙව් කාන්තා කණ්ඩායම අද(2) සමත් වුණා.

North Sydney හී දී පැවැති මෙම තරගය දෙරට අතර පැවැත්වෙන තරග 3 කින් යුත් 20යි 20 තරගාවලියේ දෙවැනි තරගය වූ අතර, මෙම තරගයෙන් කොදෙව් ක්‍රීඩිකාවන් කඩුලු 7ක සුපිරි ජයක් වාර්තා කළා.

පළමුව පන්දුවට පහරදුන් ඔස්ට්‍රේලියාව කඩුලු 6ක් දැවී ලකුණු 212 ක දැවැන්ත ලකුණු පුවරුවක් නිර්මාණය කළා.

Ellyse Perry ලකුණු 70 ක් හා Phoebe Litchfield නොදැවී ලකුණු 52 (19) ක් රැස් කළා. පන්දු යැවීමේ දී Hayley Matthews ලකුණු 36 කට කඩුලු 3 ක් දවා ගත්තා.

පිළිතුරු ඉනිම ක්‍රීඩා කළ කොදෙව් කාන්තා කණ්ඩායම ජයග්‍රාහී ඉලක්කය පසු කළේ ඉනිම නිමා වීමට පන්දුවක් ඉතිරිව තිබියදී කඩුලු 3 ක් දැවී සිටියදීයි.

නායිකා Matthews පන්දු 64 කින් නොදැවී වාර්තා කළ ලකුණු සංඛ්‍යාව 132 ක්. හයේ පහර 5කින් හා හතරේ පහර 20 කින් ඇයගේ ඉනිම වර්ණවත් වුණා. Stafanie Taylor ලකුණු 59 යි.

ඒ අනුව දෙරට අතර පැවැත්වෙන 20යි 20 තරගාවලිය මේ වන විට කණ්ඩායම් දෙකම තරග 1-1 ක් ලෙස සම තත්ත්වයේ පසුවනවා.