යශස්වි ජයිස්වාල් හා ෂුබ්මන් ගිල් පළමු කඩුල්ල වෙනුවෙන් ගොඩ නැගූ ලකුණු 165 ක විශිෂ්ඨ සම්බන්ධතාවය හමුවේ බටහිර ඉන්දීය කොදෙව් කණ්ඩායම සමග පැවැති සිව්වැනි පන්දුවාර 20යි 20 ක්රිකට් තරගයෙන් කඩුලු 9ක අනර්ඝ ජයග්රහනයක් වාර්තා කිරීමට සංචාරක ඉන්දීය කණ්ඩායම සමත් වුණා.
ඇමෙරිකාවේ ෆ්ලොරිඩාහි Lauderhill හි පැවැති තරගය ජය ගැනීම සදහා ලකුණු 179 ක ඉලක්කයක් ඉන්දියාවට ලැබී තිබූ අතර, ඔවුන් එම ඉලක්කය පසු කර ගියේ පන්දුවාර 17 ක් අවසානයේ එක් කඩුල්ලක් දැවී සිටියදීයි.
ගිල් ලකුණු 77(47) ක් රැස් කළේ හයේ පහර 5 ක් හා හතරේ පහර 3 ක් සමගින්. රොමාරියෝ ෂෙපර්ඩ්ගේ පන්දුවක් හමුවේ ඔහු දැවී ගියා.
යශස්වි ජයිස්වාල් නොදැවී ලකුණු 84 ක් ලබා ගත්තා. පන්දු 51 කින් වාර්තා වූ ඔහුගේ ඉනිමට හයේ පහර 3 ක් හා හතරේ පහර 11 ක් ඇතුළත්.
පළමුව පන්දුවට පහර දුන් කොදෙව්වන් නියමිත පන්දුවාර 20 අවසානයේ ලකුණු 178 ක් ලබා ගත්තේ කඩුලු 8 ක් දැවී සිටියදීයි.
ශිම්රන් හෙට්මයර් පන්දු 39 කින් ලකුණු 61 ක් රැස් කළා. ඒ, හයේ පහර 4 ක් හා හතරේ පහර 3ක් සමගින්.
ෂේයි හෝප් ලකුණු 45(29)යි. පන්දු යැවීමේ දී අර්ෂ්දීප් සිං ලකුණු 38 කට කඩුලු 3 ක් දවා ගත්තා. කුල්දීප් යාදව් කඩුලු 2 ක් බිද හෙලුවේ ලකුණු 26 ක් ලබා දෙමින්.
ඒ අනුව දෙරට අතර පැවැත්වෙන තරග 5 කින් යුත් 20යි 20 තරගාවලිය මේ වන විට තරග 2-2 ක් ලෙස කණ්ඩායම් දෙකම සම මට්ටමේ පසුවනවා. ඒ, තරගාවලියේ පළමු තරග දෙකම කොදෙව්වන් ජය ගෙන තිබූ පසුබිමකයි.
