ශ්රී ලංකා දග පන්දු යවන ක්රීඩක රමේෂ් මෙන්ඩිස්ගේ පන්දු යැවීමේ තාක්ෂණික ගැටලු කිහිපයක් පවතින බව ශ්රී ලංකා දග පන්දු පුහුණුකරු පියල් විජේතුංග මහතා පවසනවා.
අයර්ලන්තය සමග ගාල්ලේ පැවැත්වෙන දෙවැනි ටෙස්ට් ක්රිකට් තරගයේ පළමු දිනය අවසානයේ පැවැති මාධ්ය හමුවේ දී අදහස් දක්වමින් ඔහු ඒ බව සදහන් කළා.
මාස ගණනාවක සිට එම වැරැදි සකසා ගැනීමට මේ වන විට කටයුතු කරමින් සිටින බවයි ඔහු පෙන්වා දුන්නේ.
පන්දු යැවීමේ ඉරියව්වක වෙනසක් සිදු කිරීමේ දී පන්දු යවන්නෙකු ඊට අනුගත වීමට සැලකිය යුතු කාලයක් ගන්නා නමුත්, රමේෂ් මෙන්ඩිස්ට ඒ සදහා බලාපොරොත්තු වූ කාලයට වඩා වැඩි කාලයක් ගතව ඇති බව දග පන්දු පුහුණුකරු කියා සිටියා.
නමුත් ඔහුට සිය වැරැදි සකස් කර ගැනීම සදහා මේ වන විට ලබා දී ඇති කාලය හොදටම ප්රමාණවත් බවයි පියල් විජේතුංග මහතා අවධාරණය කළේ.
ශ්රී ලංකාව වෙනුවෙන් අඩුම ඉනිම සංඛ්යාවකදී ටෙස්ට් කඩුලු 50 ක් දවා ගත් පන්දු යවන්නා වන්නේ රමේෂ් මෙන්ඩිස්. අයර්ලන්තයට එරෙහි පළමු ටෙස්ට් තරගයේ දී යි ඔහු එම වාර්තාව පිහිටුවීමට සමත් වුණේ.
මේ අතර, අයර්ලන්තයට එරෙහි දෙවැනි ටෙස්ට් තරගයේ පළමු දිනයේ දී ශ්රී ලංකා පන්දු යවන්නන් බලාපොරොත්තු වූ ප්රමිතියට අනුව පන්දු නොයැවූ බව ද ශ්රී ලංකා දග පන්දු පුහුණුකරු පියල් විජේතුංග මහතා සදහන් කළා.
පළමු දිනය සදහා තරගය නතර කරන විට කාසියේ වාසිය දිනා පළමුව පන්දුවට පහර දෙමින් සිටි අයර්ලන්තය කඩුලු 4 ක් දැවී ලකුණු 319 ක් ලබා සිටියා.
මාධ්ය හමුවේ දර්ශන පහතින් –
