සිය 15 වැනි ටෙස්ට් ශතකය වාර්තා කරමින් අයර්ලන්තයට එරෙහි පළමු ටෙස්ට් ක්රිකට් තරගයේ මේ දක්වා වැඩි ගෞරව ශ්රී ලංකාවට නතු කර දීමට නායක දිමුත් කරුණාරත්න සමත්ව තිබෙනවා.
දෙරට අතර පළමු ටෙස්ට් තරගය ගාල්ලේ දී අද (16) ආරම්භ වූ අතර, තරගයේ කාසියේ වාසිය දිනූ ශ්රී ලංකාව පළමුවෙන් පන්දුවට පහර දීමටයි තීරණය කළේ.
ඒ අනුව පිටියට පිවිසි ශ්රී ලංකා පිතිකරුවන් තේ පානය සදහා තරගය නතර කරන විට සිය පළමු ඉනිම වෙනුවෙන් කඩුල්ලක් දැවී ලබා සිටි ලකුණු සංඛ්යාව 245 ක්.
දිමුත් පන්දු 150 කින් නොදැවී ලකුණු 114 ක් ලබා කඩුල්ලේ රැදී සිටින්නේ හතරේ පහර 9 ක් ද සමගින්. කුසල් මෙන්ඩිස් නොදැවී ලකුණු 94 යි. පන්දු 139 කින් වාර්තා වී ඇති ඔහුගේ ඉනිමට හයේ පහරක් හා හතරේ පහර 13 ක් අන්තර්ගත වී තිබෙනවා. දිමුත් හා මෙන්ඩිස් අතර මේ වන විට දෙවැනි කඩුල්ල වෙනුවෙන් ගොඩ නැගී ඇති නොබිදුණු සම්බන්ධතාවය ලකුණු 181 ක්.
ඉනිමේ පළමු කඩුල්ල ලෙස නිශාන් මදුෂ්ක ලකුණු 29කට දවා ගැනීමට කර්ටිස් කැම්පර් සමත් වුණා.
