මෙවර ඉන්දීය ප්රිමියර් ලීග් ක්රිකට් තරගාවලිය ආරම්භ කරමින් පැවැති පළමු තරගයෙන් පසුගියවර අයි.පී.එල් ශූරයින් වූ චෙන්නායි සුපර් කිංග්ස් කණ්ඩායම පරදා කඩුලු 6ක ජයක් වාර්තා කිරීමට කොල්කටා නයිට් රයිඩර්ස් කණ්ඩායම අද(26) සමත් වුණා.
මහේන්ද්ර සිං දෝනි නායකත්වයෙන් ඉවත් වීම හේතුවෙන් මුම්බායිහි වන්කඩේ ක්රීඩාංගනයේ දී පැවැති මෙම තරගයේ දී රවීන්ද්ර ජඩේජා විසින් චෙන්නායි සුපර් කිංග්ස් කණ්ඩායම මෙහෙයවනු ලැබූ අතර, කොල්කටා නයිට් රයිඩර්ස් කණ්ඩායමේ නායකත්වය දරනු ලැබුවේ ෂ්රෙයස් අයියර්.
අද පැවැති තරගයේ කාසියේ වාසිය දිනූ කොල්කටා කණ්ඩායම පළමුවෙන් පන්දු යැවීමටයි තීරණය කළේ.
ඒ අනුව පිටියට පිවිසි චෙන්නායි කණ්ඩායම නියමිත පන්දුවාර 20 තුළ කඩුලු 5ක් දැවී ලබා ගත්තේ ලකුණු 131ක් පමණයි.
ඉනිමේ 5 වැනි කඩුල්ල ලකුණු 61ක්ව තිබියදී බිද වැටුණා. රොබින් උතාපා ලකුණු 28ක් රැස් කළ අතර, අම්බටි රයිදු ලකුණු 15කට දුවද්දී දැවී ගියා.
6 වැනි කඩුල්ල වෙනුවෙන් නායක ජඩේජා හා හිටපු නායක දෝනි අතර ගොඩ නැගුණු සබදතාවය ලකුණු 70(56)ක්.
2019 වසරෙන් පසුව වාර්තා කළ සිය පළමු අයි.පී.එල් අර්ධ ශතකය රැස් කළ දෝනි නොදැවී ලකුණු 50(38)ක් ලබා ගත්තා. ජඩේජා නොදැවී ලකුණු 26යි.
පන්දු යැවීමේ දී උමේෂ් යාදෙව් ලකුණු 20කට කඩුලු 2ක් දවා ගත් අතර, වරුන් චක්රවර්තී හා ඇන්ඩ්රි රසල් කඩුල්ල බැගින් බිද හෙලුවා.
පිළිතුරු ඉනිම ක්රීඩා කළ කොල්කටා කණ්ඩායම පන්දුවාර 18.3ක් අවසානයේ කඩුලු 4ක් දැවී ජයග්රාහී ඉලක්කය පසු කළා. (133/4)
ආරම්භක පිතිකරුවන් වූ අජින්කෙයා රහානේ ලකුණු 44(34) ක්, වෙන්කටේෂ් අයියර් ලකුණු 16ක් රැස් කළා.
නිටිෂ් රානා ලකුණු 21යි. සෑම් බිලින්ග්ස් ලකුණු 25ක් ලබා ගත් අතර, නායක ෂ්රෙයස් අයියර් නොදැවී ලකුණු 20ක් වාර්තා කළා.
පන්දු යැවීමේ දී ඩ්වේයන් බ්රාවෝ ලකුණු 20කට කඩුලු 3ක් බිද හෙලුවා. මිචෙල් සැන්ට්නර් ලකුණු 31කට එක් කඩුල්ලක් දවා ගත්තා.
