ශ්රී ලංකා මුල් පෙල පිතිකරු පැතුම් නිස්සංකට ඉන්දියාව සමග පැවැත්වීමට නියමිත දෙවැනි හා අවසන් ටෙස්ට් ක්රිකට් තරගය ක්රීඩා කිරීමේ අවස්ථාව අහිමි වනු ඇති බව වාර්තා වනවා.
පුහුණුවීම් අතරතුර දී ඔහු පිට කොන්දේ ආබාධයකට ලක්වීම හේතුවෙනුයි ඔහුට එම තරගය අහිමි වීමේ අවධානමක් මතුව ඇත්තේ.
නිමා වූ පළමු ටෙස්ට් තරගයේ පළමු ඉනිමේ දී අර්ධ ශතකයක් වාර්තා කළ පැතුම් නිස්සංක මේ වන විට ශ්රී ලංකා කණ්ඩායමේ සිටින සාර්ථකම පිතිකරුවෙකු බවට පත්ව සිටින බැවින් ඔහුගේ අහිමි වීම කණ්ඩායමට ප්රබල බලපෑමක් එල්ල කරනු ඇති.
ඔහු වෙනුවට කුසල් මෙන්ඩිස් දෙවැනි ටෙස්ට් තරගය සදහා කැදවීමට ඉඩ ඇති බවයි වාර්තා වන්නේ.
පළමු ටෙස්ට් තරගයේ දී පාදයක ආබාධයකට ලක් වීම හේතුවෙන් ළහිරු කුමාරට ද දෙවැනි ටෙස්ට් තරගය සදහා ක්රීඩා කිරීමේ අවස්ථාව අහිමි වී තිබෙනවා.
ඒ අනුව ඔහු වෙනුවට දුෂ්මන්ත චමීර බොහෝ විට කණ්ඩායමට ආදේශ කරනු ඇති.
ශ්රී ලංකාව හා ඉන්දියාව අතර දෙවැනි ටෙස්ට් තරගය එළඹෙන 12 වනදා බැංගලූරුහී දී දිවා රාත්රී තරගයක් ලෙස ආරම්භ වීමට නියමිතයි.
