මෙවර ඉන්දීය ප්රිමියර් ලීග් ක්රිකට් තරගාවලිය පැවැත්වීම සදහා සැප්තැම්බර් 26 සිට නොවැම්බර් 7 දක්වා අතර කාලය යොදා ගැනීම සම්බන්ධයෙන් ඉන්දීය ක්රිකට් ආයතනයේ අවධානය යොමුව ඇති බව ක්රික්ඉන්ෆෝ වෙබ් අඩවිය වාර්තා කරනවා.
අප මීට පෙර ද වාර්තා කළ පරිදි මෙවර අයි.පී.එල් තරගාවලිය එක්සත් අරාබි එමීර් රාජ්යයේ දී පැවැත්වීම සදහායි මේ වන විට ඉන්දීය ක්රිකට් ආයතනයේ අවධානය යොමුව ඇත්තේ.
කෙසේ වෙතත්, මෙවර පන්දුවාර 20යි 20 ලෝක කුසලාන ක්රිකට් තරගාවලිය කල් දැමීමට තීරණය කළහොත් පමණක් සැප්තැම්බර් – නොවැම්බර් අතර කාලයේ දී අයි.පී.එල් තරගාවලිය පැවැත්වීමට එරට ක්රිකට් ආයතනය කටයුතු කරනු ඇති.
හෙට(20) පැවැත්වෙන අයි.සී.සී රැස්වීමේ දී 20යි 20 ලෝක කුසලානය පිළිබද අවසන් තීරණයක් ගනු ඇති බවටයි වාර්තා වන්නේ.
මේ අතර, අයි.පී.එල් තරගාවලිය එක්සත් අරාබි එමීර් රාජ්යයේ දී පැවැත්වීම සදහාත්, ඒ සදහා ක්රීඩකයින්ට සහ නිළධාරීන්ට එරටට පිටත්ව යාම සදහාත් අවසර ඉල්ලා ඉන්දීය ක්රිකට් ආයතනය ඉන්දීය රජය වෙත ලිපියක් ද යොමු කර තිබෙනවා.
පසුගිය සිකුරාදා ඉන්දීය ක්රිකට් ආයතනයේ බළධාරීන් අතර පැවැති රැස්වීමේ දී ද මේ සම්බන්ධයෙන් සාකච්ඡා කර තිබූ බවයි එරට මාධ්ය වාර්තා කර තිබුණේ.
