නියමිත කාලය තුළ දී පන්දුවාර 20 යවා නිමා නොකිරීම හේතුවෙන් රාජස්ථාන් රෝයල්ස් කණ්ඩායමට දඩ පැනවීමට ඉන්දීය ප්රිමියර් ලිග් තරගාවලියේ සංවිධායකයින් පියවර ගෙන තිබෙනවා.
ඊයේ (12) චෙන්නායි සුපර් කිංග්ස් කණ්ඩායමට එරෙහිව පැවැති මෙවර තරගාවලියේ 17 වැනි තරගයේ දී යි ඔවුන් මෙම වරද සිදු කර ඇත්තේ.
රාජස්ථාන් කණ්ඩායම මෙවර තරග වාරයේ දී මෙම වරද සිදු කළ පළමු අවස්ථාව මෙයයි. ඒ අනුව නායක සංජු සැම්සන්ට ඉන්දීය රුපියල් ලක්ෂ 12 ක දඩ පැනවීමක් සිදු කිරිමට තීරණය කර තිබෙනවා. එය ශ්රී ලංකා මුදලින් රුපියල් ලක්ෂ 47 ක පමණ අගයක්.
චෙන්නායි හි පැවැති මෙම තරගයේ පළමුවෙන් පන්දුවට පහරදුන් රාජස්ථාන් කණ්ඩායම නියමිත පන්දුවාර 20 අවසානයේ දී කඩුලු 8 ක් දැවී ලකුණු 175 ක් රැස් කළා.
පිළිතුරු ඉනිම ක්රීඩා කළ චෙන්නායි පිලට පන්දුවාර 20 අවසානයේ කඩුලු 6 ක් දැවී ලබා ගත හැකි වූයේ ලකුණු 172 ක් පමණයි.
