බටහිර ඉන්දීය කොදෙව් කණ්ඩායම සමග පැවැත්වීමට නියමිත ටෙස්ට් ක්රිකට් තරගාවලියේ දී ද නවක ක්රීඩක පැතුම් නිස්සංකට ක්රීඩා කිරීම සදහා අවස්ථාවක් හිමි වනු ඇති බව ශ්රී ලංකා කණ්ඩායමේ නායක දිමුත් කරුණාරත්න පවසනවා.
ඔහු පළමුපෙල තරගවලදී හොදින් දක්ෂතා දක්වා ඇති බැවින් අනිවාර්යයෙන්ම ඔහුට එම අවස්ථාව හිමිවන බවයි දිමුත් සදහන් කළේ.
කොදෙව් ටෙස්ට් තරගාවලිය සම්බන්ධයෙන් දැනුවත් කිරීම සදහා අද(19) පස්වරුවේ පැවැති මාධ්ය හමුවකට එක්වෙමින් ඔහු මෙම අදහස් පල කළා.
පැතුම් නිස්සංක කැපවීමෙන් පුහුණුවීම් කටයුතු ද සිදු කරන බවයි ශ්රී ලංකා කණ්ඩායමේ නායකයා සදහන් කර සිටියේ.
සීමිත පන්දුවාර තරග හා සංසන්දනය කිරීමේ දී ටෙස්ට් තරගාවලිය සදහා වෙනස් තණතීරුවක් ලැබෙනු ඇති බව දිමුත් මෙහිදී පෙන්වා දුන්නා.
ඒ අනුව තණකොල සහිත වේග පන්දු යවන්නන්ට උචිත තණතීරුවක් හිමි වීමට වැඩි ඉඩක් පවතින බවයි ඔහු කියා සිටියේ.
ඒ හේතුවෙන් කාසියේ වාසිය දිනා ගනිමින් පළමුවෙන් පන්දු යැවීමට අදහස් කර ගෙන සිටින බවත්, ටෙස්ට් තරගාවලියේ දී කාසියේ වාසිය තීරණාත්මක සාධකයක් වනු ඇති බවත් ශ්රී ලංකා නායකයාගේ අදහසයි.
පිතිකරුවන් ලකුණු 270ක් 300ක් වැනි ලකුණු ප්රමාණයක් ලබා ගැනීම වැදගත් බව ද ඔහු මෙම මාධ්ය හමුවේ දී පෙන්වා දුන්නා.
දෙරට අතර පැවැත්වෙන තරග දෙකකින් යුත් ටෙස්ට් තරගාවලියේ පළමු තරගය එළඹෙන 21 වනදා ඇන්ටිගුවාහි ශ්රීමත් විවියන් රිචර්ඩ්ස් ක්රීඩාංගනයේ දී ආරම්භ වීමට නියමිතයි.
