ඇෆ්ඝනිස්තානය සමග පැවැත්වෙන ටෙස්ට් ක්රිකට් තරගයේ තෙවැනි දිනයේ දී කොළඹ එස් එස් සී ක්රීඩාංගනයේ තණතීරුව මෙතරම් පිතිකරුවන්ට වාසිදායක වනු ඇතැයි අපේක්ෂා නොකළ බව ශ්රී ලංකා මැද පෙල පිතිකරු දිනේෂ් චන්දිමාල් පවසනවා.
තෙවැනි දිනයෙන් පසුව පැවැති මාධ්ය හමුවේ දී අදහස් දක්වමින් ඔහු ඒ බව සදහන් කළා.
තෙවැනි දිනය නිමා වන විට ඇෆ්ඝනිස්තානය සිය දෙවැනි ඉනිම වෙනුවෙන් එක් කඩුල්ලක් පමණක් දැවී ලබා සිටි ලකුණු සංඛ්යාව 199 ක්.
ඒ අනුව ඔවුන් දෙවැනි ඉනිමේ දී මේ වන විට පිටුපසින් රැදී සිටින්නේ ලකුණු 42 ක් පමණයි.
මේ වන විට ඇෆ්ඝනිස්තානය වෙනුවෙන් පන්දුවට පහර දෙමින් සිටින්නේ එරට හොදම පිතිකරුවන් දෙදෙනා බවත්, සිව්වැනි දිනයේ පළමු පැය තුළ දී නව පන්දුව ලබා ගනිමින් කඩුලු දෙකක් දවා ගැනීමට ශ්රී ලංකාවට හැකි වුවහොත් තරගය ජය ගැනීම සදහා ශ්රී ලංකාවට මනා අවස්ථාවක් උදා වන බවත්, චන්දිමාල් කියා සිටියා.
ලකුණු 200 – 250 ක පමණ ලකුණු ප්රමාණයක් හඹා ගොස් තරගය ජය ගැනීමට අවස්ථාවක් පවතින බවයි චන්දිමාල් පෙන්වා දුන්නේ.
ඇෆ්ඝනිස්තාන පන්දු යවන්නන් ද ශ්රී ලංකා පළමු ඉනිම පුරා ඉතා හොදින් පන්දු යැවූ බවයි දිනේෂ් චන්දිමාල් මාධ්ය හමුවේ වැඩිදුරටත් සදහන් කළේ.
ඇෆ්ඝනිස්තානයට තවත් ටෙස්ට් තරග ලැබෙන්නේ නම් ඔවුන් ඉදිරි වසර පහ තුළ ඉතාමත් හොද ටෙස්ට් කණ්ඩායමක් බවට පත් වනු ඇති බව ද ශ්රී ලංකා හිටපු නායකයා පවසා සිටියා.
තමා දන්නා පරිදි ඇෆ්ඝනිස්තාන ක්රීඩකයින්ට පුහුණුවීම් සිදු කිරීමට හෝ නිසි ස්ථානයක් නොමැති බවත්, ඇෆ්ඝනිස්තාන කණ්ඩායමේ අනාගතය සුබ වන්නැයි තමා සුබපතන බවත්, දිනේෂ් චන්දිමාල් වැඩිදුරටත් මාධ්ය හමුවේ සදහන් කළා.
