මුම්බායි ඉන්දියන්ස් කණ්ඩාමේ හිමිකාරීත්වය විසින් එම කණ්ඩායමේ ප්රධාන පුහුණුකරු, ශ්රී ලංකා හිටපු ක්රිකට් නායක මහේල ජයවර්ධනට උසස් වීමක් ලබා දී තිබෙනවා.
මුම්බායි කණ්ඩායමේ හිමිකාරීත්වය විසින් MI Emirates (එම් අයි එමිරේට්ස්) හා MI Cape Town (එම් අයි කේප් ටවුන්) නමින් තවත් කණ්ඩායම් දෙකක් එක්සත් අරාබි එමීර් රාජ්යයේ (International League T20 තරගාවලිය) හා දකුණු අප්රිකාවේ (SA20 තරගාවලිය) පැවැත්වීමට නියමිත 20යි 20 ලීග් තරගාවලි සදහා ද ඇතුළත් කිරීමට ගෙන ඇති තීරණයත් සමගයි මෙම පියවර ඔවුන් ගෙන ඇත්තේ.
ඒ අනුව මහේල ජයවර්ධන එම් අයි සමූහයේ කාර්යය සාධනය පිළිබඳ ගෝලීය ප්රධානියා (Global Head of Performance) ලෙස පත් කර තිබෙනවා.
සමස්ත උපායමාර්ගික සැලසුම් ඇතුළුව, එම් අයි සමූහයේ ලොව පුරා ක්රිකට් මෙහෙයුම් සඳහා ජ්යෙෂ්ඨ නායකත්වය සැපයීම, ඒකාබද්ධ ගෝලීය ඉහළ කාර්යය සාධනයක් සහිත පරිසර පද්ධතියක් නිර්මාණය කිරීම, එක් එක් කණ්ඩායමේ පුහුණු සහ සහාය ව්යුහයන් සඳහා වගකීම මෙන්ම, සහයෝගීතාවය සහතික කිරීම සඳහා කණ්ඩායම්වල ප්රධාන පුහුණුකරුවන් සමඟ සමීපව කටයුතු කිරීම හා ස්ථාවර ක්රිකට් සන්නාමයක් බිහි කිරීම යන වගකීම් මෙහිදී ඔහුට පැවරෙනවා.
ඒ අනුව නව තනතුර භාර ගැනීම වෙනුවෙන් ඔහු මෙතෙක් දැරූ මුම්බායි ඉන්දියන්ස් කණ්ඩායමේ ප්රධාන පුහුණුකරු ධූරයෙන් ද ඉවත් වී තිබෙනවා.
මේ අතර, සහීර් ඛාන් එම් අයි සමූහයේ ක්රිකට් සංවර්ධන ගෝලීය ප්රධානියා (Global Head of Cricket Development) ලෙස ද උසස් කිරීමට කණ්ඩායම් කළමණාකාරීත්වය කටයුතු කර තිබෙනවා.
