ආසියානු කුසලාන එක්දින ක්රිකට් තරගාවලිය සදහා ඉන්දීය සංචිතය හෙට(21) දිනයේ දී නම් කිරීමට නියමිතව තිබෙනවා.
අජිත් අගාර්කර්ගේ සභාපතිත්වයෙන් යුත් ඉන්දීය ක්රිකට් තේරීම් කමිටුව හෙට දිනයේ දී නව දිල්ලි හී දී රැස් වීමට නියමිතව ඇති බවයි ඉන්දීය මාධ්ය වාර්තා කර ඇත්තේ.
මෙම රැස්වීම සදහා ඉන්දීය නායක රෝහිත් ෂර්මා හා පුහුණුකරු රාහුල් ඩ්රාවිඩ් ද එක්වීමට නියමිතයි.
ඒ අනුව ආබාධවලට ලක්ව සිටි කේ.එල් රාහුල් හා ෂ්රෙයස් අයියර් ආසියානු කුසලාන තරගාවලියට ක්රීඩා කරන්නේ ද යන්න සම්බන්ධයෙන් හෙට දිනයේ දී ප්රේක්ෂකයින්ට දැන ගැනීමට හැකියාව ලැබෙනු ඇති.
අගෝස්තු 30 වැනිදා ආරම්භ වන ආසියානු කුසලාන තරගාවලිය සදහා මෙන්ම ඔක්තෝබර් 5 වැනිදා ආරම්භ වීමට නියමිත එක්දින ලෝක කුසලාන ක්රිකට් තරගාවලිය සදහා ද එකම සංචිතයක් නම් කිරීමටයි ඉන්දීය තේරීම් කමිටුවේ අවධානය යොමුව ඇත්තේ.
සැප්තැම්බර් 5 වැනිදා වන විට ලෝක කුසලාන තරගාවලිය සදහා ක්රීඩා කරන කණ්ඩායම් සිය මූලික සංචිත අයි.සී.සීය වෙත ලබා දිය යුතුයි.
ආසියානු කුසලානය වෙනුවෙන් නම් කරන ක්රීඩකයින් හා තවත් අතිරේක ක්රීඩකයින් කිහිප දෙනෙකු දින 6ක කාලයක් බැංගලූරුහී දී පුහුණු කදවුරකට එක්වීමට නියමිත අතර, අනතුරුව ඉන්දීය කණ්ඩායම ශ්රී ලංකාව බලා පැමිණීමට නියමිතයි.
ආසියානු කුසලාන තරගාවලිය යටතේ ඉන්දියාව ක්රීඩා කරන පළමු තරගය සැප්තැම්බර් දෙවැනිදා පාකිස්තානයට එරෙහිව පල්ලේකැලේ ක්රීඩාංගනයේ දී යි පැවැත්වීමට නියමිතව ඇත්තේ.
ආසියානු කුසලාන තරගාවලියෙන් පසුව ඉන්දියාව හා ඔස්ට්රේලියාව අතර එක්දින තරගාවලියක් ද පැවැත්වීමට නියමිත අතර, අනතුරුව ලෝක කුසලාන තරගාවලිය යටතේ ඉන්දියාව ක්රීඩා කරන පළමු තරගය ද ඔක්තෝබර් 8 වැනිදා ඔස්ට්රේලියාවට එරෙහිව පැවැත්වීමට නියමිතයි.
