2023 ඉන්දීය ප්රිමියර් ලීග් ක්රිකට් තරගාවලියේ ක්රීඩක වෙන්දේසියට පෙර ශ්රී ලංකා ක්රීඩකයින් කිහිප දෙනෙකුම සිය සංචිතවල රදවා ගැනීමට අයි.පී.එල් කණ්ඩායම් හිමිකරුවන් කටයුතු කර තිබෙනවා.
ඒ ඒ කණ්ඩායම් විසින් සිය සංචිතවල රදවා ගත් හා නිදහස් කෙරුණු ක්රීඩකයින්ගේ ලැයිස්තුව නිවේදනය කිරීමට ලබා දී ඇති අවසන් දිනය අද වන අතර, මේ වන විට සියලු කණ්ඩායම් විසින් ඊට අදාළ තොරතුරු නිවේදනය කරමින් පවතිනවා.
ඒ අනුව පසුගිය තරග වාරයේ දී පංජාබ් කිංග්ස් කණ්ඩායම නියෝජනය කළ භානුක රාජපක්ෂ සිය සංචිතයේ රදවා ගැනීමටයි කිංග්ස් කණ්ඩායම තීරණය කර ඇත්තේ.
2022 තරග වාරය සදහා කොල්කටා නයිට් රයිඩර්ස් කණ්ඩායම සමග එක්ව සිටි තුන් ඉරියව් ක්රීඩක චාමික කරුණාරත්න සිය සංචිතයෙන් නිදහස් කළ බව කොල්කටා කණ්ඩායම මේ වන විට නිවේදනය කර තිබෙනවා.
ශ්රී ලංකා වේග පන්දු යවන ක්රීඩක දුෂ්මන්ත චමීර සිය සංචිතයෙන් නිදහස් කිරීමට ලක්නව් සුපර් ජයන්ට්ස් කණ්ඩායම පියවර ගෙන තිබෙනවා.
චෙන්නායි සුපර් කිංග්ස් කණ්ඩායම විසින් ශ්රී ලංකා දග පන්දු යවන ක්රීඩක මහීෂ් තීක්ෂණ සිය සංචිතයේ රදවා ගැනීමටයි තීරණය කර ඇත්තේ.
එමෙන්ම යොවුන් වේග පන්දු යවන ක්රීඩක මතීෂ පතිරණ ද සිය සංචිතයේ රදවා ගැනීමට චෙන්නායි කණ්ඩායමේ හිමිකාරීත්වය පියවර ගෙන තිබීම විශේෂත්වයක්.
මේ අතර, ශ්රී ලංකා දග පන්දු යවන ක්රීඩක වනිදු හසරංග සිය සංචිතයේ රදවා ගැනීමට රෝයල් චැලෙන්ජර්ස් බැංගලෝර් කණ්ඩායම පියවර ගෙන තිබෙනවා.
2023 ඉන්දීය ප්රිමියර් ලීග් ක්රිකට් තරගාවලියේ ක්රීඩක වෙන්දේසිය දෙසැම්බර් 23 වැනිදා කෝචි හී දී පැවැත්වීමට නියමිතයි.
