කෙරෝනා අර්බුදය හමුවේ වුවද එල්.පී.එල් හෙවත් ලංකන් ප්රිමියර් ලීග් ක්රිකට් තරගාවලිය එළඹෙන අගෝස්තු මාසයේ දී පැවැත්වීම සදහා ශ්රී ලංකා ක්රිකට් ආයතනය තීරණය කර තිබෙනවා.
ඒ අනුව අගෝස්තු මස දෙවැනි සතියේ දී තරගාවලිය ආරම්භ කිරීමට අවශ්ය කටයුතු සූදානම් කරන්නැයි ක්රිකට් ආයතනයේ සභාපති ශම්මි සිල්වා මහතා විසින් ප්රධාන විධායක නිළධාරී ඈෂ්ලි ද සිල්වා මහතා වෙත උපදෙස් ලබා දී ඇති බව සදහන්.
ඔහු විසින් විදෙස් ක්රීඩකයින් සම්බන්ධ කර ගැනීම, අනුග්රාහකයින් සම්බන්ධ කර ගැනීම මෙන්ම කණ්ඩායම් මිලදී ගැනීම සදහා කැමැත්තෙන් පසුවන පාර්ශව සම්බන්ධ කර ගැනීමට අදාළ කටයුතු සිදු කරනු ඇති.
කොරෝනා වසංගතය හේතුවෙන් තරගාවලිය පැවැත්වීම සදහා රජයේ අනුමැතිය ද අවශ්ය වන බැවින් මේ වන විටත් ඊට අදාළ රජයේ අනුමැතිය ලැබී ඇති බවයි වාර්තා වන්නේ.
තරගාවලිය පැවැත්වීමට හැකි වුවහොත් එය කණ්ඩායම් 5කගේ සහභාගීත්වයකින් යුත්, දින 23ක තරගාවලියක් ලෙස පැවැත්වීමට නියමිතයි.
මෙහි පළමු අදියර 2012 වසරේ දී පැවැත්වුණේ ශ්රී ලංකන් ප්රිමියර් ලීග් (SLPL) යන නමින්.
