ඔස්ට්රේලියානු වමත් දග පන්දු යවන ක්රීඩක මැතිව් කුහ්නෙමන්ගේ පන්දු යැවීමේ ඉරියව්ව සැක සහිත බවට චෝදනා එල්ල වී තිබෙනවා.
ශ්රී ලංකාව සමග ගාල්ලේදී පැවැති ටෙස්ට් තරගාවලියෙන් අනතුරුවයි තරග නිලධාරීන් විසින් ඔහුට එරෙහිව මෙම චෝදනා එල්ල කර ඇත්තේ.
එම ටෙස්ට් තරගාවලියේදී ඉහළ දක්ෂතාවයක් ප්රදර්ශනය කළ 28 හැවිරිදි කුහ්නෙමන් කඩුලු 16 ක් දවා ගැනීමට සමත් වුණා.
කෙසේ වෙතත්, පන්දු යැවීමේ ඉරියව්ව සැක සහිත බවට එල්ල වී ඇති චෝදනාව හේතුවෙන් ඔහුට අයි.සී.සී අනුමත මධ්යස්ථානයකදී සිය පන්දු යැවීමේ ඉරියව්ව පිළිබද පරීක්ෂණයකට ඉදිරියේදී මුහුණ දීමට සිදු වනවා.
බොහෝ විට බ්රිස්බේන්හීදී ඔහු එම පරීක්ෂණයට මුහුණ දීමට ඉඩ ඇති බව සදහන්.
2017 වසරේදී ආරම්භ කළ ඔහුගේ වෘත්තීය ක්රිකට් දිවියේදී පන්දු යැවීමේ ඉරියව්ව සැක සහිත බවට ඔහුට චෝදනා එල්ල වූ පළමු අවස්ථාව මෙයයි.
කුහ්නෙමන් මේ දක්වා පළමු පෙල තරග 28 ක්, List A එක්දින තරග 41 ක් හා විස්සයි 20 තරග 55 ක් ක්රීඩා කර තිබෙනවා. ඔහු ක්රීඩා කර ඇති ටෙස්ට් තරග සංඛ්යාව 5 ක්. එහිදී කඩුලු 25 ක් දවා ගැනීමට කුහ්නෙමන් සමත් වුණා. එක්දින ජාත්යන්තර තරග 4 ක් ද ඔහු ක්රීඩා කර තිබෙනවා.
ශ්රී ලංකා සංචාරයට පෙර බිග් බෑෂ් ලීග් ක්රිකට් තරගාවලියට ක්රීඩා කරමින් සිටියදී ඔහු ඇගිල්ලක ආබාධයකට ද ලක් වූ අතර, ඒ හේතුවෙන් ඔහුට ශ්රී ලංකා සංචාරය අහිමි වීමේ අවධානමක්ද මතුව තිබුණා. නමුත්, ඔහු කඩිනමින් අවශ්ය ශාරීරික යෝග්යතාවය ළගා කර ගනිමින් ශ්රී ලංකා සංචාරයට එක් වුණා.
Australia’s Matt Kuhnemann, who took 16 wickets in the 2-0 series win against Sri Lanka in Galle, has been reported for a suspect bowling action. pic.twitter.com/FuM928sNvF
— Azzam Ameen (@AzzamAmeen) February 12, 2025
