ශ්රී ලංකා ක්රිකට් කණ්ඩායමේ තාවකාලික ප්රධාන පුහුණුකරු ලෙස සනත් ජයසූරිය මහතා කටයුතු කිරීමට නියමිතව ඇති බව Sunday Times පුවත්පත වාර්තා කර තිබෙනවා.
ප්රධාන පුහුණුකරු ලෙස කටයුතු කළ ක්රිස් සිල්වර්වුඩ් නිමා වූ විස්සයි 20 ලෝක කුසලාන ක්රිකට් තරගාවලියෙන් පසුව සිය ධූරයෙන් ඉවත් වූ අතර, අනතුරුව නව ප්රධාන පුහුණුකරුවෙකු පත් කිරීමට මෙතෙක් කටයුතු කර නැහැ.
එම කටයුතු තවදුරටත් සිදු වෙමින් පවතින බැවින් එළඹෙන ඉන්දීය හා එංගලන්ත තරගාවලි වෙනුවෙන් ශ්රී ලංකා කණ්ඩායමේ තාවකාලික ප්රධාන පුහුණුකරු ලෙස සනත් ජයසූරිය පත් කිරීමටයි තීරණය කර ඇත්තේ.
හිටපු ශ්රී ලංකා ක්රිකට් නායකයෙකු ද වන හිටපු සුපිරි පිතිකරු සනත් ජයසූරිය මහතා ශ්රී ලංකා ක්රිකට් උපදේශකයෙකු ලෙස පසුගිය දෙසැම්බර් මාසයේ දී පත් කෙරුණා.
වසරක කාලයක් සදහා බලපැවැත්වෙන පරිදි එම පත් කිරීම සිදු කළ අතර, නිමා වූ පන්දුවාර විස්සයි 20 ලෝක කුසලාන තරගාවලියේ දී ශ්රී ලංකා කණ්ඩායම සමග ද ඔහු උපදේශකයෙකු ලෙස රැදී සිටියා.
මීට පෙර සනත් ජයසූරිය මහතා ශ්රී ලංකා ක්රිකට් තේරීම් කමිටුවේ සභාපතිවරයෙකු ලෙස ද කටයුතු කර තිබෙනවා.
ඉන්දීය කණ්ඩායමේ එළඹෙන ශ්රී ලංකා තරග සංචාරයට එක්දින තරග 3ක් හා විස්සයි 20 තරග 3ක් ඇතුළත් අතර, අනතුරුව සිදු කරන එංගලන්ත තරග සංචාරයේ දී ටෙස්ට් තරග තුනක් ශ්රී ලංකා කණ්ඩායම ක්රීඩා කිරීමට නියමිතයි.
