පළමු ටෙස්ට් ක්රිකට් තරගයේ දී දින 3ක් තුළ ලැබූ අමිහිරි පරාජයෙන් පසුව දෙවැනි ටෙස්ට් තරගයේ පළමු දිනයේ දිවා ආහාරයේ සිට තේ පානය දක්වා වූ කාලයේ දී කඩුලු 4 ක් දවා ගනිමින් ඉන්දියාවට යම් තර්ජනයක් එල්ල කරමින් දෙරට අතර ඉතිහාසයේ පැවැත්වෙන 100 වැනි ටෙස්ට් තරගයට යම් ධනාත්මක ආරම්භයක් ලබා ගැනීමට බටහිර ඉන්දීය කොදෙව් කණ්ඩායම සමත් වුණා.
නමුත් ට්රිනිඩෑඩ්හි Port of Spain හීදී පැවැත්වෙන තරගයේ පළමු දිනය මෙරට වේලාවෙන් අද (21) අලුයම නිමා වුණේ රෝහිත් ෂර්මා හා යශස්වි ජයිස්වාල් පළමු කඩුල්ලට ගොඩ නැගූ ලකුණු 139 ක සම්බන්ධතාවය සහ විරාත් කෝලි හා රවීන්ද්ර ජඩේජා 5 වැනි කඩුල්ලට ගොඩ නගා ඇති ලකුණු 106 ක නොබිදුණු සම්බන්ධතාවය හමුවේ දිනයේ වැඩි ගෞරව ඉන්දියාවට හිමි කරමින්.
තරගයේ කාසියේ වාසිය දිනූ කොදෙව්වන් පළමුවෙන් පන්දු යැවීමටයි තීරණය කළේ. ආරම්භක කඩුල්ලේ සම්බන්ධතාවය බිද දමමින් ජයිස්වාල් ලකුණු 57 කට දැවී ගියා. යළි අසාර්ථක වූ ෂුබ්මන් ගිල් ලකුණු 10 කට දැවී ගිය අතර, රෝහිත් ෂර්මා ලකුණු 80 ක් රැස් කළා. අජින්කෙයා රහානේ ලබා ගත්තේ ලකුණු 8 ක් පමණයි.
තරගය ආරම්භ වූ මොහොතේ සිට දිවා ආහාරය දක්වා වූ කාලයේ දී හා තේ පානයේ සිට තරගය පළමු දිනයට අත්හිටුවන අවස්ථාව දක්වා වූ කාලයේ දී කිසිදු කඩුල්ලක් බිද වැටුණේ නැහැ.
තම 500 වැනි ජාත්යන්තර තරගය ක්රීඩා කරන කෝලි නොදැවී ලකුණු 87 ක් ලබා කඩුල්ලේ රැදී සිටිනවා. ජඩේජා නොදැවී ලකුණු 36 යි.
පන්දු යැවීමේ දී කෙමා රෝච්, ෂෙනොන් ගේබ්රියල්, ජොමෙල් වොරිකන් හා ජේසන් හෝල්ඩර් කඩුල්ල බැගින් බිද හෙලුවා.
