සංචාරක ඔස්ට්රේලියානු කණ්ඩායම හා ඉන්දීය කණ්ඩායම අතර පැවැත්වෙන තරග 4කින් යුත් බෝර්ඩර්-ගවස්කාර් කුසලාන ටෙස්ට් ක්රිකට් තරගාවලියේ දෙවැනි තරගය අද(17) දිල්ලි හී දී ආරම්භ වුණා.
තරගයේ පළමු දිනය නිමා වන විට සිය පළමු ඉනිම ක්රීඩා කරමින් සිටි ඉන්දියාව කිසිදු කඩුල්ලක් නොදැවී ලකුණු 21 ක් ලබා සිටියා. ඒ, කාසියේ වාසිය දිනා පළමුව පන්දුවට පහරදුන් ඕස්ට්රේලියාව සියලු දෙනා දැවී ලබා ගත් ලකුණු 263 ට පිළිතුරු වශයෙන්.
රෝහිට් ෂර්මා ලකුණු 13 ක් හා කේ.එල් රාහුල් ලකුණු 4 ක් ලබා ඉන්දීය පළමු ඉනිම වෙනුවෙන් මේ වන විට නොදැවී කඩුල්ලේ රැදී සිටිනවා.
පළමුවෙන් පන්දුවට පහරදුන් ඔස්ට්රේලියානු ඉනිමේ පළමු කඩුල්ල බිද වැටුණේ ලකුණු 50 දී යි. ඒ, ඩේවිඩ් වෝනර් ලකුණු 15 කට දැවී යාමත් සමගයි.
මර්නස් ලබුෂේන් ලකුණු 18කටත්, ස්ටීවන් ස්මිත් ලකුණු නොලබා සිටියදීත් එකම පන්දුවාරයකදී දවා ගැනීමට ආර්. අශ්වින් සමත් වුණා. මැට් රේන්ෂෝ වෙනුවට මෙම තරගයට කැදවූ ට්රැවිස් හෙඩ් රැස් කළේ ලකුණු 12 ක් පමණයි. ඇලෙක්ස් කෙරීට ලකුණු ලබා ගැනීමට හැකි වූයේ නැහැ.
ආරම්භක පිතිකරු උස්මාන් කවාජා සටන්කාමී ඉනිමක් දියත් කරමින් ලකුණු 81 ක් ලබා ගත්තේ හයේ පහරක් හා හතරේ පහර 12 ක් සමගින්. රවීන්ද්ර ජඩේජාගේ පන්දුවකට රිවර්ස් ස්වීප් පහරක් එල්ල කිරීමට ගොස් ඔහු දැවී ගියා. ඒ, කේ.එල් රාහුල් රැක ගත් විශිෂ්ඨ උඩ පන්දුවක් හමුවේයි.(එහි දර්ශන පහතින් නරඹන්න)
නායක පැට් කමින්ස් ලකුණු 33 ක් ලබා ගනිමින් ඔස්ට්රේලියානු ඉනිම ශක්තිමත් කළ අතර, නොදැවුණු ලකුණු 72 ක් වාර්තා කරමින් පීටර් හැන්ඩ්ස්කොම්බ් ඔස්ට්රේලියානු ඉනිම සටන්කාමී ලකුණු සංඛ්යාවක් කරා රැගෙන ගියා. ඔහුගේ ඉනිමට හතරේ පහර 9 ක් ඇතුළත්.
පන්දු යැවීමේ දී මොහමඩ් ෂාමි ලකුණු 60 කට කඩුලු 4 ක් දවා ගත් අතර, රවිචන්ද්රන් අශ්වින් හා රවීන්ද්ර ජඩේජා අතරේ කඩුලු 3 බැගින් බෙදී ගියා.
ICYMI – WHAT. A. CATCH 😯😯
WOW. A one-handed stunner from @klrahul to end Usman Khawaja’s enterprising stay!#INDvAUS pic.twitter.com/ODnHQ2BPIK
— BCCI (@BCCI) February 17, 2023
