ඇෆ්ඝනිස්තානය සමග පැවැත්වීමට නියමිතව තිබූ එක්දින ක්රිකට් තරගාවලිය නොපැවැත්වීමට ඔස්ට්රේලියානු ක්රිකට් ආයතනය තීරණය කර ඇති පසුබිමක වුව ද, ඇෆ්ඝනිස්තානය සමග පැවැත්වීමට නියමිත ද්විපාර්ශ්වික ක්රිකට් තරගාවලිය අවලංගු කිරීමට තම ආයතනය සූදානම් නොමැති බව පාකිස්තාන ක්රිකට් ආයතනය පවසනවා.
එම ආයතනයේ සභාපති නජාම් සෙති පෙන්වා දෙන්නේ දේශපාලනය හා ක්රිකට් ක්රීඩාව පටලවාගත යුතු නොමැති බවයි.
ඇෆ්ඝනිස්තානය තුළ අධ්යාපනය සදහා කාන්තාවන්ට තවදුරටත් සීමා පැනවීමට පාලක තලේබාන් සංවිධානය තීරණය කර ඇති බැවිනුයි ඔස්ට්රේලියානු ක්රිකට් ආයතනය විසින් ඇෆ්ඝනිස්තානයට එරෙහි තරගාවලිය අවලංගු කිරීමට මෑතකදී පියවර ගත්තේ.
ඇෆ්ඝනිස්තානයට එරෙහිව පැවැත්වීමට නියමිතව තිබූ එක්දින ක්රිකට් තරගාවලිය තරග 3 කින් යුත් 20යි 20 තරගාවලියක් ලෙස පැවැත්වීමට පාකිස්තාන ක්රිකට් ආයතනය මේ වන විට එකගතාවයකට එළඹ තිබෙනවා.
ඊට හේතු වී ඇත්තේ පාකිස්තානය හා ඇෆ්ඝනිස්තානය මේ වන විටත් 2023 එක්දින ක්රිකට් ලෝක කුසලාන තරගාවලිය සදහා සුදුසුකම් ලබා තිබීමයි.
ඒ හේතුවෙන් අයි.සී.සී ක්රිකට් ලෝක කුසලාන සුපර් ලීගයට අයත් අදාළ එක්දින තරගාවලියේ ප්රතිපලය ලෝක කුසලානයට සුදුසුකම් ලැබීමට බලපෑමක් සිදු නොකරන බැවින් අදාළ තරගාවලිය 20යි 20 තරගාවලියක් ලෙස පැවැත්වීමට තීරණය කර තිබෙනවා.
20යි 20 තරගාවලිය මාර්තු 20 වැනිදා සිට 28 වැනිදා දක්වා සාජා හී දී පැවැත්වීමට නියමිතයි.
