මෙවර පන්දුවාර 20යි 20 ලෝක කුසලාන ක්රිකට් තරගාවලියේ සුපිරි 12 වටයේ ශ්රී ලංකාව රැදී සිටින පළමු කාණ්ඩය සදහා සුදුසුකම් ලබා ගැනීමට අයර්ලන්ත කණ්ඩායම අද (21) සමත් වුණා.
ඒ, මෙවර තරගාවලියේ පළමු වටයේ දී B කාණ්ඩයේ දෙවැනි ස්ථානය දිනා ගැනීමට ඔවුන් සමත් වීමත් සමගයි.
ඔවුන් තරග තුනෙන් තරග දෙකක් ජය ගනිමින් දෙවැනි ස්ථානය දිනා ගත් අතර, එම කාණ්ඩයේ පළමු ස්ථානය දිනා ගත්තේ තරග තුනෙන් තරග දෙකක් ජය ගත් සිම්බාබ්වේ කණ්ඩායමයි.
දල ලකුණු ලබා ගැනීමේ වේගය අනුව සිම්බාබ්වේ කණ්ඩායම ඉදිරියෙන් පසු වූ බැවිනුයි ඔවුන් එම කාණ්ඩයේ පෙරමුණ හිමි කර ගත්තේ.
ඒ අනුව සුපිරි 12 වටයේ දී පළමු කාණ්ඩයෙන් තරග වදින ශ්රී ලංකා කණ්ඩායමේ ප්රතිවාදීන් වන්නේ ඇෆ්ඝනිස්තානය, ඔස්ට්රේලියාව, එංගලන්තය, නවසීලන්තය හා පළමු වටයේ B කාණ්ඩයේ දෙවැනි ස්ථානය දිනා ගත් අයර්ලන්ත කණ්ඩායමයි.
සුපිරි 12 වටයේ දී ශ්රී ලංකාව ක්රීඩා කරන පළමු තරගය එළඹෙන 23 වැනිදා අයර්ලන්ත කණ්ඩායමට එරෙහිව හෝබාර්ට් හී දී පැවැත්වීමට නියමිතව තිබෙනවා. එම තරගය මෙරට වේලාවෙන් පෙරවරු 9.30ට ආරම්භ වීමට නියමිතයි.
අනතුරුව එළඹෙන 25 වැනිදා සත්කාරක ඔස්ට්රේලියාවට එරෙහිව ශ්රී ලංකාව තරග වදින්නේ පර්ත් ක්රීඩාංගනයේ දී යි. (පස්වරු 4.30ට)
සුපිරි 12 වටය යටතේ ශ්රී ලංකාව ක්රීඩා කරන තෙවැනි තරගය නවසීලන්තයට එරෙහිව එළඹෙන 29 වැනිදා සිඩ්නි ක්රීඩාංගනයේ දී පස්වරු 1.30ට ආරම්භ වීමට නියමිතව ඇති අතර, ශ්රී ලංකා කණ්ඩායම නොවැම්බර් පළමු වැනිදා බ්රිස්බේන් හී දී ඇෆ්ඝනිස්තානයට එරෙහිව තරග වැදීමට නියමිතයි.(පෙරවරු 9.30ට)
ශ්රී ලංකාව හා එංගලන්තය අතර තරගය පැවැත්වෙන්නේ නොවැම්බර් 5 වැනිදා සිඩ්නි ක්රීඩාංගනයේ දී යි.(පස්වරු 1.30ට)
