පාකිස්තානය සහ ඔස්ට්රේලියාව අතර පැවැති පළමු ටෙස්ට් ක්රිකට් තරගය සදහා යොදා ගත් රාවල්පින්ඩිහි ක්රීඩාංගනයේ තණතීරුව නියමිත ප්රමිතියට නොතිබූ (below average) බව ජගත් ක්රිකට් කවුන්සලය (අයි.සී.සී) පවසනවා.
එම තරගයේ තරග තීරකවරයා ලෙස කටයුතු කළ රංජන් මඩුගල්ල මහතා මේ බව තීරණය කර ඇති බවයි අයි.සී.සීය අද(10) නිවේදනය කළේ.
ඒ අනුව ක්රීඩාංගනයට එරෙහිව දඩුවම් ලකුණක් ද (demerit point) පැනවීමට පියවර ගෙන තිබෙනවා.
තරගයක් සදහා යොදා ගැනෙන තණතීරුව නියමිත සාමාන්ය ප්රමිතියට වඩා පහළ මට්ටමක් (below average) ඇති බවට නියම කෙරෙන අවස්ථාවලදී එක් දඩුවම් ලකුණක් පනවනු ලබනවා.
තණතීරුවක් “දුර්වල” යැයි තරග තීරකවරයා විසින් ප්රකාශයට පත් කළහොත් දඩුවම් ලකුණු 3ක් ද, “නුසුදුසු” යැයි තීරණය කළහොත් දඩුවම් ලකුණු 5ක් ද පනවනු ලබනවා.
දෙරට අතර පැවැති පළමු ටෙස්ට් තරගය ජය පරාජයෙන් තොරව අවසන් වූ අතර, තරගයේ දී ක්රියාත්මක වූයේ ඉනිම් 3ක් පමණයි.
එහිදී ලකුණු 1,187 ක් වාර්තා කිරීමට පිතිකරුවන්ට හැකි වුණා.
පන්දු යවන්නන්ට දවා ගැනීමට හැකි වූයේ කඩුලු 14ක් පමණයි.
