ඉන්දීය ටෙස්ට් ක්රිකට් කණ්ඩායමේ නායක විරාට් කෝලි දකුණු අප්රිකාව සමග ආරම්භ වීමට නියමිත තරග 3කින් යුත් එක්දින ක්රිකට් තරගාවලියෙන් ඉවත් වීමට තීරණය කර ඇති බව ඉන්දීය මාධ්ය වාර්තා කරනවා.
සිය දියණියගේ පළමු උපන් දිනය යෙදී ඇති බැවින් ඔහු අදාළ තීරණය ගෙන ඇති බවයි එම මාධ්ය වාර්තා වැඩිදුරටත් සදහන් කර සිටියේ.
එක්දින තරගාවලියෙන් ඉවත් වීමට අදාළව ඉල්ලීමක් කෝලි විසින් එරට ක්රිකට් ආයතනයට යොමු කර ඇති අතර, ඒ සම්බන්ධයෙන් ඉන්දීය ක්රිකට් ආයතනය මෙතෙක් සිය තීරණය ප්රකාශයට පත් කර නැහැ.
මේ අතර, ආබාධයක් හේතුවෙන් ටෙස්ට් තරගාවලියට ක්රීඩා නොකරන රෝහිට් ෂර්මාට එක්දින තරගාවලිය සදහා ක්රීඩා කිරීමට හැකි වනු ඇති බව සදහන්.
ඔහුගේ වම් පාදයේ ආබාධ තත්ත්වය සුව වීමට මාසයක පමණ කාලයක් ගත වනු ඇතැයි අපේක්ෂා කෙරෙනවා.
ෂර්මා එරට එක්දින කණ්ඩායමේ නිත්ය නායකත්වයට පත් වීමෙන් පසුව ඔහු ක්රීඩා කිරීමට නියමිත පළමු එක්දින තරගාවලිය වන්නේ ද දකුණු අප්රිකාවට එරෙහි එක්දින තරගාවලියයි.
එළඹෙන 26 වනදා ආරම්භ වන ඉන්දීය කණ්ඩායමේ දකුණු අප්රිකා තරග සංචාරයේ දී දෙරට අතර ටෙස්ට් තරග 3ක් හා එක්දින තරග 3ක් පැවැත්වීමට නියමිතයි.
එක්දින තරගාවලිය ආරම්භ වීමට නියමිතව ඇත්තේ ජනවාරි 19 වැනිදායි.
