නවසීලන්ත හා එංගලන්ත ක්රිකට් ආයතන විසින් සිය ජාතික කණ්ඩායම් සදහා යෙදී තිබූ පාකිස්තාන තරග සංචාරය අවලංගු කිරීමට ගත් ක්රියාමාර්ගය සම්බන්ධයෙන් ඔස්ට්රේලියානු පිතිකරු උස්මාන් කවාජා දැඩි ලෙස විවේචනයට ලක් කර තිබෙනවා.
පාකිස්තානයේ උපත ලැබූ ක්රීඩකයෙකු වන උස්මාන් කවාජා පෙන්වා දෙන්නේ අදාළ සංචාර ඉන්දියාව වෙත යෙදී තිබුණේ නම් එම රටවල් කිසිසේත්ම අදාළ සංචාර අවලංගු නොකරනු ඇති බවයි.
නවසීලන්තය සිය පාකිස්තාන තරග සංචාරය පළමු එක්දින තරගය ආරම්භ වීමට මොහොතකට පෙර අවලංගු කර පාකිස්තානයෙන් පිටව ගියේ ආරක්ෂාව සම්බන්ධයෙන් ගැටලු සහගත තත්ත්වයක් පවතින බව පවසමින්. අනතුරුව එංගලන්තය ද ඉදිරියේ දී සිදු කිරීමට නියමිත පාකිස්තාන තරග සංචාරය අවලංගු කිරීමට කටයුතු කළා.
“මම හිතන්නේ ක්රීඩකයින්ට හා සංවිධායකයන්ට කියන්න ගොඩක් පහසුයි පාකිස්තානයට බැහැ කියලා, මොකද එය පාකිස්තානය නිසා” යනුවෙන් කවාජා සදහන් කළා.
“එය බංග්ලාදේශය වුණානම් ඒත් ඒ දෙයම සිදු වේවි”
“නමුත් මෙවැනි තත්ත්වයත් තිබුණත් කිසිවෙකුත් ඉන්දියාවටනම් බැහැ කියන එකක් නැහැ.”
වාණිජ තත්ත්වය හේතුවෙන් එලෙස ඉන්දීය සංචාර අවලංගු කිරීමට කිසිවෙකුත් නොපෙළඹෙන බව ඔහුගේ අදහසයි.
ලබන වසර මුලදී පාකිස්තාන තරග සංචාරයක නිරත වීමට ඔස්ට්රේලියාවට ද නියමිතව ඇති අතර, උස්මාන් කවාජා සදහන් කර සිටියේ තමන්ට පාකිස්තාන තරග සංචාරයක නිරත වීමේ කිසිදු ගැටලුවක් නොමැති බවයි.
