ශ්රී ලංකා හිටපු ක්රිකට් තරු තුනකගේ සහභාගීත්වයෙන් පැවති අතථ්ය සුහද පිළිසඳරක් නැරඹීමේ අවස්ථාව සමාජමාධ්ය පරිශීලකයන්ට උදා වුණා.
ඊට ශ්රී ලංකාවෙන් බිහි වූ විශිෂ්ඨයන් තිදෙනෙකු වන තිලකරත්න ඩිල්ෂාන්, සනත් ජයසූරිය සහ රසල් ආනෝල්ඩ් යන හිටපු ක්රීඩකයනුයි සහභාගී වුණේ.
ඔවුන් තිදෙනා ක්රීඩාවේ නිරතව සිටි අවධියේ සිදුවූ බොහෝ රසබර සිදුවීම් මෙම වැඩසටහනේ දී කතා බහට ලක් වූ අතර, ඉදිරි අනාගතයේ ක්රිකට් ක්රීඩාවේ සිදුවිය යුතු වෙනස්කම් පිළිබඳව ද කතා කරන්නට ඔවුන් අමතක කළේ නැහැ.
අතීත මතකාවර්ජන කතාබහට ලක්වන අතරතුර රසල් ආනෝල්ඩ්ට මුහුණ පෑමට සිදුවු අකරතැබ්බයක් පිළිබඳ මතකයක් අවධි කරන්නට සනත් ජයසූරීය කටයුතු කළා.
රසල් ආනෝල්ඩ් යනු වඩාත් විනෝදකාමී සුහදශීලී චරිතයක් බව ඔබ අප කවුරුත් දන්නා කරුණක්.
හිටපු පුහුණුකරු ඩේව් වට්මෝර් හට උසුලු විසුළු කරමින් නිතරම ඔහුව තරහ ගැන්වීමේ පුරුද්දක් රසල්ට තිබූ බවයි මෙම වැඩසටහනේ දී සනත් ජයසූරිය සදහන් කළේ.
සිම්බාබ්වේ කණ්ඩායම සමග පැවති ටෙස්ට් තරගයක් නිමාවීමෙන් පසුව ක්රීඩකයන් එකතු වී පවත්වන කණ්ඩායම් රැස්වීමක් අතරවාරයේ, එවකට ශ්රී ලංකා කණ්ඩායමේ පුහුණුකරු වු ඩේව් වට්මෝර් විසින් දුම්වැටියක් භාවිතා කර තිබෙනවා.
මේ අවස්ථාවේදී රසල් ආනෝල්ඩ් විසින් විහිලුවට මෙන්, “මෙතන දුම්වැටි පාවිච්චි කරන්න ඔබට බැහැ” යනුවෙන් පවසා තිබෙනවා.
එයට යම් ආවේගශීලී ප්රතිචාරයක් දක්වා තිබු වට්මෝර් දුම්වැටි අලු රඳවන බඳුන රසල්ගේ මුහුණ දෙසට විසිකළ බව සනත් ජයසූරිය සදහන් කළා.
එය මුහුණේ ගැටී රසල් ආනොල්ඩ්ගේ දතකට ද හානි සිදු වූ අයුරු ජයසූරිය විසින් මෙහිදී අනාවරණය කළේ ඉතාමත් සිනාමුසු මුහුණින්.
බිඳුණු දත තවමත් එළෙසම පවතින බවයි සනත් වැඩිදුරටත් සදහන් කර සිටියේ.
