කඩුලු 5 ක් දවා ගනිමින් මිචෙල් ස්ටක් දැක් වූ විශිෂ්ඨ පන්දු යැවීම හා ඔස්ට්රේලියානු ආරම්භක පිතිකරුවන්ගේ සුපිරි ප්රහාරය හේතුවෙන් ඉන්දියාව සමග පැවැති දෙවැනි එක්දින ක්රිකට් තරගයෙන් කඩුලු 10 ක පහසු ජයක් වාර්තා කරමින් දෙරට අතර පැවැත්වෙන තරග 3කින් යුත් එක්දින තරගාවලිය තරග 1-1 ක් ලෙස සම තත්ත්වයට ගෙන ඒමට ඔස්ට්රේලියානු කණ්ඩායම අද(19) සමත් වුණා.
විසාකාපට්නම් හී දී පැවැති තරගයේ කාසියේ වාසිය දිනූ ඔස්ට්රේලියාවේ ආරාධනයෙන් පළමුව පන්දුවට පහරදුන් ඉන්දියාවට පන්දුවාර 26 ක් අවසානයේ සියලු දෙනා දැවී ලබා ගත හැකි වූයේ ලකුණු 117 ක් පමණයි.
පිළිතුරු ඉනිම ක්රීඩා කළ ඔස්ට්රේලියාව ජයග්රාහී ඉලක්කය පසු කළේ පන්දුවාර 11 ක් පමණක් අවසන්ව තිබූ පසුබිමකයි. ආරම්භක පිතිකරුවන් වූ ට්රැවිස් හෙඩ් පන්දු 30 කින් නොදැවී ලකුණු 51 ක් හා මිචෙල් මාෂ් පන්දු 36 කින් නොදැවී ලකුණු 66 ක් රැස් කරමින් සිය කණ්ඩායමට කඩුලු 10 ක අනර්ඝ ජයග්රහනයක් හිමි කර දුන්නා.
ට්රැවිස් හෙඩ්ගේ ඉනිමට හතරේ පහර 10 ඇතුළත් වූ අතර, මාෂ්ගේ ඉනිමට හයේ පහර හා හතරේ පහර 6 බැගින් ඇතුළත් වුණා.
තරගයේ පළමුව පන්දුවට පහරදුන් ඉන්දීය ඉනිමේ දී ආරම්භක පිතිකරු ෂුබ්මන් ගිල් ලකුණු නොලබා සිටියදීත්, නායක රෝහිත් ෂර්මා ලකුණු 13 කටත්, සූර්යකුමාර් යාදව් පළමු පන්දුවෙන් ලකුණු නොලබා සිටියදීත්, කේ.එල් රාහුල් ලකුණු 9කටත්, ඉනිමේ අවසන් කඩුල්ල ලෙස මොහමඩ් සිරාජ් ලකුණු නොලබා සිටියදීත් දවා ගැනීමට මිචෙල් ස්ටක් සමත් වුණේ ඔහු යොමු කළ පන්දුවාර 8 තුළදී ලකුණු 53 ක් ප්රතිවාදීන්ට ලබා දෙමින්.
ඉන්දීය ඉනිමේ වැඩිම ලකුණු ලාභියා වූ විරාට් කෝලි ලකුණු 31 ක් ලබා ගත්තා. රවීන්ද්ර ජඩේජා ලකුණු 16 කට දැවී ගිය අතර, අක්සාර් පටෙල් නොදැවී ලකුණු 29යි.
පන්දු යැවීමේ දී ශෝන් ඇබෝට් කඩුලු 3 ක් හා නේදන් ඇලස් කඩුලු 2 ක් දවා ගැනීමට ද සමත් වුණා.
