බංග්ලාදේශ තුන් ඉරියව් ක්රීඩක ශකිබ් අල් හසාන්ගේ පන්දු යැවීමේ ඉරියව්ව නීති විරෝධී බවට තහවුරු වී තිබෙනවා.
ඒ, Loughborough විශ්ව විද්යාලයේදී සිදු කෙරුණු ඔහුගේ පන්දු යැවීමේ ඉරියව්ව පිළිබද පරීක්ෂණයේදීයි.
ඒ අනුව එංගලන්ත හා වෙල්ස් ක්රිකට් ආයතනය සංවිධාන කරන තරගාවලියන්ට අදාළව ඔහුට එරෙහිව පන්දු යැවීමේ තහනමක් පැනවීමටයි එරට ක්රිකට් ආයතනය පියවර ගෙන ඇත්තේ.
දෙසැම්බර් 10 වැනිදා සිට බලපැවැත්වෙන පරිදි එම තහනම පනවා ඇති බව එංගලන්ත ක්රිකට් ආයතනය සදහන් කළා. තහනම ඉවත් කර ගැනීමටනම් ඔහු විසින් යළිත් පන්දු යැවීමේ ඉරියව්ව පිළිබද පරීක්ෂණයට මුහුණ දී ඉන් සමත් විය යුතු වනවා.
2024 එංගලන්ත ප්රාන්ත සිව්දින ක්රිකට් තරගාවලිය (County Championship) යටතේ ශකිබ් සරේ කණ්ඩායම නියෝජනය කරමින් සැප්තැම්බර් මාසයේ දී සමර්සෙට් කණ්ඩායමට එරෙහිව එක් තරගයක් සදහා ක්රීඩා කළ අතර, එම තරගයේදීයි විනිසුරුවන් විසින් ඔහුගේ පන්දු යැවීමේ ඉරියව්ව සැක සහිත බවට චෝදනා කර තිබුණේ.
එය ඔහුගේ පන්දු යැවීමේ ඉරියව්ව සැක සහිත බවට චෝදනා එල්ල වූ පළමු අවස්ථාවයි.
සමර්සෙට් කණ්ඩායම සමග පැවැති තරගයේ දී 37 හැවිරිදි ශකිබ් අල් හසාන් කඩුලු 9ක් දවා ගනිමින් ඉහළ දක්ෂතා දැක්වීමට සමත් වුණා. එම තරගයේ දී ඔහු පන්දුවාර 63 කට වඩා වැඩි පන්දුවාර සංඛ්යාවක් යොමු කළා.
දශක දෙකකට ආසන්න කාලයක් ජාත්යන්තර ක්රිකට් පිටියේ රැදී සිටින ශකිබ් මේ දක්වා ජාත්යන්තර තරග 447 කදී දවා ගෙන ඇති කඩුලු ගණන 712 ක්.
