එක්සත් අරාබි එමීර් රාජ්යයේ පැවැති ජාත්යන්තර ලීග් 20යි 20 ක්රිකට් තරගාවලියේ ශූරතාවය දිනා ගැනීමට ගල්ෆ් ජයන්ට්ස් කණ්ඩායම අද(12) සමත් වුණා.
ඒ, ඩුබායි හී දී පැවැති අවසන් මහා තරගයේ දී ශ්රී ලංකාවේ වනිදු හසරංග ක්රීඩා කළ ඩෙසර්ට් වයිපර්ස් කණ්ඩායම පරදා කඩුලු 7 ක ජයක් වාර්තා කරමින්.
තරගය ජය ගැනීම සදහා ලකුණු 147 ක ඉලක්කයක් හඹා ගිය ගල්ෆ් කණ්ඩායම පන්දුවාර 18.4 ක් අවසානයේ කඩුලු 3 ක් පමණක් දැවී ජයග්රාහී ඉලක්කය සපුරා ගත්තා.
ක්රිස් ලින් නොදැවී ලකුණු 72 ක් ලබා ගත්තේ පන්දු 50 කින්. ඒ, හයේ පහරක් හා හතරේ පහර 9 ක් සමගින්. ජෙරාඩ් එරාස්මස් ලකුණු 30 ක් හා ශිම්රන් හෙට්මයර් පන්දු 13 කින් නොදැවී ලකුණු 25 ක් ලබා ගනිමින් සිය කණ්ඩායම ජයග්රහනය කරා රැගෙන යාමට සමත් වුණා.
පන්දු යැවීමේ දී වනිදු හසරංග ලකුණු 28 කට කඩුල්ලක් දවා ගත් අතර, ටොම් කරන් හා ලුක් වුඩ් අතරේ ද කඩුල්ල බැගින් බෙදී ගියා.
අවසන් මහා තරගයේ කාසියේ වාසිය දිනූ ජයන්ට්ස් කණ්ඩායම පළමුවෙන් පන්දු රැකීමට තීරණය කළ අතර, ඒ අනුව පිටියට පිවිසි වයිපර්ස් පිතිකරුවන් නියමිත පන්දුවාර 20 නිමා කළේ කඩුලු 8 ක් දැවී ලකුණු 146 ක් ලබා ගනිමින්.
ඩෙසර්ට් වයිපර්ස් ඉනිමේ කඩුලු 4 ක් ලකුණු 44 ක් තුළ බිද වැටුණේ පන්දුවාර 8.3 ක් තුළදීයි.
අනතුරුව සෑම් බිලින්ග්ස් සමග පිටියේ එක් වූ වනිදු හසරංග 5 වැනි කඩුල්ල සදහා පන්දු 37 කින් ලකුණු 72 ක වේගවත් සම්බන්ධතාවයක් ගොඩ නැගුවා.
බිලින්ග්ස් පන්දු 29 කින් රැස් කළ ලකුණු සංඛ්යාව 31ක්. වේගවත් ඉනිමක් ක්රීඩා කළ හසරංග පන්දු 21 කින් සිය අර්ධ ශතකය සම්පූර්ණ කළා. ඔහු දැවී ගියේ පන්දු 27 කින් ලකුණු 55 ක් ලබා සිටියදීයි. වනිදු හසරංගගේ ඉනිමට හයේ පහර 2 ක් හා හතරේ පහර 6 ක් ඇතුළත්.
පන්දු යැවීමේ දී කාර්ලස් බ්රැත්වෙයිට් කඩුලු 3 ක් ද, කායිස් අහ්මඩ් කඩුලු 2 ක් ද දවා ගත්තා.
