දිල්ලි කැපිටල්ස් කණ්ඩායමේ නායක රිෂාබ් පාන්ට්ට එරෙහිව එක් තරගයක තහනමක් පනවා තිබෙනවා.
මැයි 7 වැනිදා දිල්ලිහී දී රාජස්ථාන් රෝයල්ස් කණ්ඩායමට එරෙහිව පැවැති තරගයේ දී දිල්ලි කණ්ඩායම නියමිත කාලය තුළ දී පන්දුවාර 20 යවා නිමා නොකිරීම හේතුවෙනුයි ඔහුට මෙම තහනම පනවා ඇත්තේ.
ඒ අනුව රෝයල් චැලෙන්ජර්ස් බැංගලූරු කණ්ඩායමට එරෙහිව බැංගලූරුහි එම් චින්නස්වාමි ක්රීඩාංගනයේ දී හෙට (12) පැවැත්වීමට නියමිත තරගය සදහා රිෂාබ් පාන්ට් හට ක්රීඩා කිරීමට හැකි වන්නේ නැහැ.
මීට අමතරව ඉන්දීය රුපියල් ලක්ෂ 30 ක දඩ මුදලක් ද රිෂාබ් පාන්ට්ට පනවා තිබෙනවා.
එමෙන්ම අදාළ තරගයේ දී දිල්ලි කණ්ඩායම වෙනුවෙන් ක්රීඩා කළ සෙසු සියලු ක්රීඩකයින්ට (Impact Player ද ඇතුළුව) රුපියල් ලක්ෂ 12 බැගින් වන දඩ මුදලක් හෝ තරග ගාස්තුවෙන් 50% ක දඩ මුදලක් පැනවීමට ද පියවර ගෙන ඇති බවයි අයි.පී.එල් තරගාවලියේ සංවිධායකයින් නිවේදනය කළේ.
මෙය පාන්ට්ගේ නායකත්වයෙන් දිල්ලි කණ්ඩායම මෙවර තරගාවලියේ දී නියමිත කාලය තුළ දී පන්දුවාර සංඛ්යාව නිමා නොකිරීමේ වරද සිදු කළ තෙවැනි අවස්ථාවයි.
තරග තීරකවරයා විසින් ලබා දුන් තීන්දුවට එරෙහිව දිල්ලි කණ්ඩායම විසින් අභියාචනයක් ගොණු කර තිබූ නමුත්, සිදු කෙරුණු විභාග කිරීමකින් අනතුරුව තරග තීරකවරයාගේ මෙම තීරණය අවසන් තීරණය බවට ප්රකාශයට පත් කර තිබෙනවා.
අයි.පී.එල් තරගාවලියේ දී සෑම කණ්ඩායමකටම නියමිත පන්දුවාර 20 යවා නිමා කිරීමට මිනිත්තු 85 ක කාලයක් ලැබෙන අතර, රාජස්ථාන් පිලට එරෙහි අදාළ තරගයේ දී දිල්ලි ක්රීඩකයින් පන්දුවාර 20 යවා නිමා කිරීමට මිනිත්තු 117 ක පමණ කාලයක් ලබා ගෙන තිබුණා.
මේ අතර, රිෂාබ් පාන්ට්ට පැනවූ තහනම හේතුවෙන් අක්සාර් පටෙල් කණ්ඩායමේ වැඩබලන නායකයා ලෙස පත් කිරීමට ද පියවර ගෙන තිබෙනවා.
