ඔස්ට්රේලියානු ඉනිමේ පළමු කඩුලු 7 ලකුණු 91 ක් තුළ බිද වැටුණු පසුබිමක ග්ලේන් මැක්ස්වෙල් දියත් කළ අනපේක්ෂිත සුපිරි පිතිහරඹය හමුවේ මෙවර ලෝක කුසලාන එක්දින ක්රිකට් තරගාවලියේ 39 වැනි තරගයෙන් ඇෆ්ඝනිස්තානය පරදා කඩුලු තුනක අනර්ඝ ජයග්රහනයක් වාර්තා කරමින් තරගාවලියේ අවසන් පූර්ව වටයට සුදුසුකම් ලැබූ තෙවැනි කණ්ඩායම බවට පත් වීමට ඔස්ට්රේලියාව අද(7) සමත් වුණා.
ඒ අනුව අවසන් පූර්ව වටයේ දී ඔස්ට්රේලියානු කණ්ඩායමේ ප්රතිවාදීන් බවට පත් වන්නේ දකුණු අප්රිකාවයි.
මුම්බායිහි පැවැති තරගයේ කාසියේ වාසිය දිනා පළමුව පන්දුවට පහරදුන් ඇෆ්ඝනිස්තානය පන්දුවාර 50 තුළ කඩුලු 5 ක් දැවී ලකුණු 291 ක් ලබා ගත් අතර, පිළිතුරු ඉනිම ක්රීඩා කළ ඔස්ට්රේලියාව පන්දුවාර 46.5 ක් අවසානයේ කඩුලු 7ක් දැවී ජයග්රාහී ඉලක්කය පසු කළා.
ඔස්ට්රේලියානු ඉනිමේ පළමු කඩුලු 7 ලකුණු 91 ක් තුළ බිද වැටුණේ තරගයේ සම්පූර්ණ පාලනය ඇෆ්ඝනිස්තානයට නතු කරමින්. කෙසේ වෙතත්, අනතුරුව ග්ලේන් මැක්ස්වෙල් සමග පිටියේ එක් වූ නායක පැට් කමින්ස් 8 වැනි කඩුල්ල සදහා පන්දු 170 කින් ලකුණු 202 ක නොබිදුණු සම්බන්ධතාවයක් ගොඩ නගමින් ඔස්ට්රේලියාවට නොසිතූ ජයක් හිමි කර දුන්නා.
එම සම්බන්ධතාවයේ දී කමින්ස් රැස් කළේ ලකුණු 12 (පන්දු 68) ක් පමණයි. සුපිරි ඉනිමක් ක්රීඩා කළ මැක්ස්වෙල් පන්දු 128 කින් ලකුණු 201 ක් නොදැවී ලබා ගත්තා. ඒ, හයේ පහර 10 කින් හා හතරේ පහර 21 කින් සිය ඉනිම වර්ණවත් කර ගනිමින්.
ඔහුව දවා ගැනීම සදහා ලද උඩ පන්දු දෙකක් රැක ගැනීමට ඇෆ්ඝනිස්තාන පන්දු රකින්නන්ට නොහැකි වීම තරගයේ තීරණයට දැඩිව බලපාන ලැබුවා.
පන්දු යැවීමේ දී නවීන් උල් හක්, අස්මතුල්ලාහ් ඔමර්සායි හා රෂීඩ් ඛාන් කඩුලු 2 බැගින් බිද හෙලුවා.
පළමුව පන්දුවට පහරදුන් ඇෆ්ඝනිස්තානය වෙනුවෙන් ආරම්භක පිතිකරු ඊබ්රහීම් සඩ්රාන් පන්දු 143 කින් නොදැවී ලකුණු 129 ක් ලබා ගත්තේ හයේ පහර 3 ක් හා හතරේ පහර 8 ක් සමගින්. රෂීඩ් ඛාන් නොදැවී ලකුණූ 35(18) යි.
පන්දු යැවීමේ දී ජොෂ් හේසල්වුඩ් කඩුලු 2 ක් දවා ගත්තා.
[team_standings 51865]
