මයිකල් බ්රේස්වෙල් වාර්තා කළ නොදැවුණු වේගවත් ශතකය හේතුවෙන් අයර්ලන්තය සමග Dublin හි පැවැති පළමු එක්දින ක්රිකට් තරගයෙන් එක් කඩුල්ලක තියුණු ජයක් වාර්තා කිරීමට සංචාරක නවසීලන්ත කණ්ඩායම සමත් වුණා.
තරගය ජය ගැනීම සදහා ලකුණු 301 ක ඉලක්කයක් හමා ගිය නවසීලන්තය කඩුලු 9ක් දැවී සිටියදී ජයග්රාහී ඉලක්කය පසු කළේ ඉනිම නිමා වීමට එක් පන්දුවක් ඉතිරිව තිබියදීයි.
නවසීලන්ත ඉනිමේ 8 වැනි කඩුල්ල ලකුණු 217 දී බිද වැටුණු පසුබිමකයි ඔවුන් මෙම ජයග්රහනය වාර්තා කළේ.
අනතුරුව 9 වැනි කඩුල්ල සදහා පන්දු 38 කින් ලකුණු 64 ක සබදතාවයක් ගොඩ නැගීමට බ්රේස්වෙල් හා ලොකී ෆර්ගසන් සමත් වුණා. ෆර්ගසන් රැස් කළේ ලකුණු 8ක් පමණයි.
ඔහුගේ දැවී යාම සිදු වන අවස්ථාවේ දී තරගය ජය ගැනීම සදහා නවසීලන්තය අවසන් පන්දු 6 තුළ ලකුණු 20 ක් ලබා ගත යුතුව තිබූ අතර, මයිකල් බ්රේස්වෙල් පන්දු 5ක් පමණක් වැය කර ලකුණු 24 ක් වාර්තා කරමින් නවසීලන්තයට සුපිරි ජයග්රහනයක් වාර්තා කර දුන්නා. ඒ, ක්රෙයිග් යන්ග් යොමු කළ අවසන් පන්දුවාරයේ දී පළමු පන්දු පහට පිළිවෙලින් 4, 4, 6, 4, 6 ක් වාර්තා කරමින්.
බ්රේස්වෙල් පන්දු 82 කින් නොදැවී රැස් කළ ලකුණු සංඛ්යාව 127 ක්. ඔහුගේ ඉනිම හයේ පහර 7කින් හා හතරේ පහර 10 කින් වර්ණවත් වුණා.
මාර්ටින් ගප්ටිල් ද ලකුණු 51 ක් ලබා ගනිමින් නවසීලන්ත මුල් පෙල ශක්තිමත් කළා. පන්දු යැවීමේ දී කර්ටිස් කැම්පර් ලකුණු 49කට කඩුලු 3ක් දවා ගත්තා.
තරගයේ කාසියේ වාසිය දිනූ නවසීලන්තයේ ආරාධනයෙන් පළමුව පන්දුවට පහර දුන් අයර්ලන්තය නියමිත පන්දුවාර 50 තුළ ලකුණු 300ක් ලබා ගත්තේ කඩුලු 9ක් දැවී සිටියදීයි.
Harry Tector ලකුණු 113ක් රැස් කරමින් අයර්ලන්ත ඉනිම ශක්තිමත් කළා.
පන්දු යැවීමේ දී ලොකී ෆර්ගසන්, Blair Tickner හා ඉෂ් සෝදි කඩුලු 2 බැගින් බිද හෙලුවා.
