තෙවැනි වරටත් පන්දුවාර 20යි 20 ලෝක කුසලාන ක්රිකට් තරගාවලියක අවසන් මහා තරගයක් සදහා සුදුසුකම් ලබා ගැනීමට පාකිස්තාන කණ්ඩායම අද(9) සමත් වුණා.
ඒ, මෙවර 20යි 20 ලෝක කුසලාන තරගාවලියේ පළමු අවසන් පූර්ව තරගයෙන් නවසීලන්තය පරදා කඩුලු 7 ක ජයක් වාර්තා කරමින්.
සිඩ්නි හී දී පැවැති තරගයේ කාසියේ වාසිය දිනා පළමුව පන්දුවට පහර දුන් නවසීලන්තය කඩුලු 4 ක් දැවී ලකුණු 152 ක් ලබා ගත්තා.
ඩැරල් මිචෙල් පන්දු 35 කින් ලකුණු 53 ක් නොදැවී රැස් කළ අතර, කේන් විලියම්සන් ලකුණු 46(42) යි.
පන්දු යැවීමේ දී ශහීන් ශාහ් අෆ්රිඩි කඩුලු 2 ක් හා මොහමඩ් නවාස් එක් කඩුල්ලක් දවා ගත්තා.
පිළිතුරු ඉනිම ක්රීඩා කළ පාකිස්තානය පන්දුවාර 19.1 ක් අවසානයේ කඩුලු 3 ක් දැවී ජයග්රාහී ඉලක්කය පසු කළා.
පළමු කඩුල්ල සදහා ලකුණු 105 ක සම්බන්ධතාවයක් ගොඩ නැගීමට මොහමඩ් රිස්වාන් හා බාබර් අසාම් සමත් වුණා.
බාබර් ලකුණු 53 කට දැවී ගිය අතර, රිස්වාන් ලකුණු 57 ක් රැස් කළා. මොහමඩ් හැරිස් ලකුණු 30යි. පන්දු යැවීමේ දී ට්රෙන්ට් බෝල්ට් කඩුලු 2ක් ද, මිචෙල් සැන්ට්නර් එක් කඩුල්ලක් ද බිද හෙලුවා.
තරගාවලියේ දෙවැනි අවසන් පූර්ව තරගය ඇඩිලේඩ් හී දී ඉන්දියාව හා එංගලන්තය අතර හෙට පැවැත්වීමට නියමිතයි.
