දකුණු අප්රිකා කාන්තා කණ්ඩායම සමග පැවැති දෙවැනි පන්දුවාර විස්සයි 20 ක්රිකට් තරගයෙන් කඩුලු 7ක විශිෂ්ඨ ජයක් වාර්තා කිරීමට සංචාරක ශ්රී ලංකා කාන්තා කණ්ඩායම අද(30) සමත් වුණා.
Potchefstroom හි පැවැති තරගයේ කාසියේ වාසිය දිනා පළමුව පන්දුවට පහරදුන් දකුණු අප්රිකාව නියමිත පන්දුවාර 20 අවසානයේ කඩුලු 8 ක් දැවී ලකුණු 137 ක් ලබා ගත්තා.
පිළිතුරු ඉනිම ක්රීඩා කළ ශ්රී ලංකාව පන්දුවාර 18.5 ක් අවසානයේ කඩුලු 3ක් දැවී ජයග්රාහී ඉලක්කය පසු කළා.
චමරි අතපත්තු ලකුණු හයකටත්, හර්ෂිතා සමරවික්රම ලකුණු 12 කටත්, හසිනි පෙරේරා එක් ලකුණකටත් දැවී ගියා.
ලකුණු 62 දී තෙවැනි කඩුල්ල දැවී යාමෙන් පසුව සිව්වැනි කඩුල්ල සදහා ලකුණු 76* (46) ක අගනා සම්බන්ධතාවයක් ගොඩ නගමින් ශ්රී ලංකාව ජයග්රහනය කරා රැගෙන ගියේ ආරම්භක පිතිකාරිණී විශ්මි ගුණරත්න හා කවීෂා දිල්හාරි.
විශ්මි නොදැවී ලකුණු 65 ක් ලබා ගත්තේ පන්දු 57 කින්. හයේ පහරක් හා හතරේ පහර 9ක් ඇයගේ ඉනිමට ඇතුළත්. කවීෂා දිල්හාරි නොදැවී ලකුණු 45 යි. පන්දු 28 කින් වාර්තා වූ ඇයගේ ඉනිමට හතරේ පහර 6ක් ඇතුළත්.
පළමුව පන්දුවට පහරදුන් දකුණු අප්රිකාව පන්දුවාර 10 ක් අවසානයේ කඩුලු 2 ක් දැවී ලකුණු 84 ක් ලබා ප්රබල ස්ථානයක පසු වූ නමුත්, අවසන් පන්දුවාර 10 තුළ දී සටනට අවතීර්ණ වූ ශ්රී ලංකා ක්රීඩිකාවන් එම පන්දුවාර 10 තුළ දී ලකුණු 53 ක් පමණක් ප්රතිවාදීන්ට ලබා දී කඩුලු හයක් දවා ගැනීමට සමත් වුණා.
Anneke Bosch ලකුණු 50 ක් හා Marizanne Kapp ලකුණු 44 ක් රැස් කළා.
පන්දු යැවීමේ දී අචිනි කුලසූරිය ලකුණු 26 කට කඩුලු 2ක් දවා ගත්තා. දකුණු අප්රිකා ඉනිමේ දී දුවද්දී දැවී යාම් තුනක් වාර්තා වීමත් කැපී පෙනුණා.
අද ශ්රී ලංකාව ලැබූ ජයත් සමග දෙරට අතර පැවැත්වෙන තරග 3කින් යුත් විස්සයි 20 තරගාවලිය මේ වන විට තරග 1-1 ක් ලෙස කණ්ඩායම් දෙකම සම තත්ත්වයේ පසුවනවා.
