ආසියානු කුසලාන එක්දින ක්රිකට් තරගාවලියේ 11 වැනි තරගයේ දී පසුගිය 14 වැනිදා ආබාධයකට ලක් වූ ශ්රී ලංකා දග පන්දු යවන ක්රීඩක මහීෂ් තීක්ෂණට තරගාවලියේ අවසන් මහා තරගය ක්රීඩා කිරීමේ අවස්ථාව අහිමි වී තිබෙනවා.
පාකිස්තානය සමග පැවැති අදාළ තරගයේ දී පන්දු රකිමින් සිටියදීයි තීක්ෂණ දකුණු පාදයේ ආබාධයකට ලක් වුණේ.
කෙසේ වෙතත්, ආබාධය ද පසෙකලා ඔහු සිය අවසන් පන්දුවාර කිහිපය යොමු කිරීම කැපී පෙනුණා.
එම තරගයේ දී තීක්ෂණ සිය පන්දුවාර 9 තුළ දී ලකුණු 42 කට එක් කඩුල්ලක් දවා ගැනීමට සමත් වුණා.
ශ්රී ලංකා ක්රිකට් ආයතනය මීට පෙර නිවේදනය කළේ ඔහුගේ ආබාධ තත්ත්වය හදුනා ගැනීම සදහා ඔහුව ඊයේ දිනයේ දී වෛද්ය පරීක්ෂණයක් සදහා යොමු කිරීමට කටයුතු කරන බවයි.
එම වෛද්ය වාර්තාවල ප්රතිපල අනුව ඔහුට අවසන් තරගය ක්රීඩා කළ නොහැකි බව අනාවරණය වී තිබෙනවා.
ඒ අනුව ඔහු පුනරුත්ථාපන කටයුතු වෙනුවෙන් ඉහළ කාර්ය සාධන මධ්යස්ථානය වෙත යොමු කිරීමට නියමිතයි.
තීක්ෂණ වෙනුවට සහන් ආරච්චිගේ ශ්රී ලංකා සංචිතයට ආදේශ කිරීමට පියවර ගෙන ඇති බවයි ශ්රී ලංකා ක්රිකට් ආයතනය නිවේදනය කළේ.
අවසන් මහා තරගය හෙට (17) ශ්රී ලංකාව හා ඉන්දියාව අතර කොළඹ ආර්. ප්රේමදාස ක්රීඩාංගණයේ දී පැවැත්වීමට නියමිතයි.
