ට්ර්රැවිස් හෙඩ් පන්දු 129 කින් නොදැවී රැස් කළ ලකුණු 154 හමුවේ එංගලන්තය සමග පැවැති පළමු එක්දින ක්රිකට් තරගයෙන් කඩුලු හතක විශිෂ්ඨ ජයක් වාර්තා කරමින් තරග 5 කින් යුත් එක්දින තරගාවලියට ජයග්රාහී ආරම්භයක් ලබා ගැනීමට සංචාරක ඔස්ට්රේලියානු කණ්ඩායම සමත් වුණා.
නොටින්හැම්හි පැවැති තරගයේ පළමුව පන්දුවට පහරදුන් එංගලන්තය පන්දුවාර 49.4 ක් අවසානයේ සියලු දෙනා දැවී ලකුණු 315 ක් රැස් කළ නමුත්, පිළිතුරු ඉනිම ක්රීඩා කළ ඔස්ට්රේලියාව පන්දුවාර 44 ක් පමණක් වැය කරමින් කඩුලු 3 ක් දැවී ජයග්රාහී ඉලක්කය පසු කළා.
සිය කණ්ඩායම සුපිරි ජයක් කරා රැගෙන ගිය ආරම්භක පිතිකරු ට්රැවිස් හෙඩ්ගේ ඉනිමට හයේ පහර 5 ක් හා හතරේ පහර 20 ක් ඇතුළත්.
මර්නස් ලබුෂේන් නොදැවී ලකුණු 77 ක් රැස් කළේ පන්දු 61 කින්. හෙඩ් හා ලබුෂේන් අතර සිව්වැනි කඩුල්ලට ගොඩ නැගුණු නොබිදුණු සම්බන්ධතාවය ලකුණු 148 (107)ක්. ස්ටීවන් ස්මිත් හා කැමරන් ග්රීන් ලකුණු 32 බැගින් රැස් කළා.
පළමුව පන්දුවට පහරදුන් එංගලන්තය වෙනුවෙන් බෙන් ඩකට් ලකුණු 95 ක් හා විල් ජැක්ස් ලකුණු 62 ක් ලබා ගත්තා.
පන්දු යැවීමේ දී ඇඩම් සම්පා හා මර්නස් ලබුෂේන් කඩුලු 3 බැගින් බිද හෙලුවා.
