ටමිම් ඉක්බාල් ගත් තීරණය යළි සලකා බලන්නැයි එරට තේරීම් කමිටුවෙන් ඉල්ලීමක්

ඉදිරි මාස 6ක කාලය තුළ 20යි 20 ජාත්‍යන්තර තරග සදහා ක්‍රීඩා නොකිරීමට බංග්ලාදේශ ආරම්භක පිතිකරු ටමිම් ඉක්බාල් ගත් තීරණය සම්බන්ධයෙන් යළි සලකා බලන ලෙසට ඔහුගෙන් ඉල්ලීමක් සිදු කරන බව එරට තේරීම් කමිටු ප්‍රධානී Minhajul Abedin පවසනවා.

ඔහු එලෙස 20යි 20 ජාත්‍යන්තර පිටියෙන් තාවකාලිකව ඉවත් වීමට ගත් තීරණය නිවේදනය කිරීමෙන් දිනකට පසුව ටමිම් ඉක්බාල් බංග්ලාදේශ ප්‍රිමියර් ලීග් තරගාවලියේ දී නොදැවුණු ශතකයක් වාර්තා කිරීමට සමත් වුණා.

මිනිස්ටර් ඩකා (Minister Dhaka) කණ්ඩායම වෙනුවෙන් ඔහු එම ශතකය වාර්තා කළේ සිල්හෙට් සන්රයිසස් (Sylhet Sunrisers) කණ්ඩායමට එරෙහිවයි.

මෙවර බංග්ලාදේශ ප්‍රිමියර් ලීග් තරගාවලියේ මේ වන විට වැඩිම ලකුණු ලාභියා වන්නේ ද ටමිම් ඉක්බාල්.

20යි 20 ජාත්‍යන්තර පිටියෙන් තාවකාලිකව ඉවත් වීමට ඔහු ගත් තීරණය හේතුවෙන් ඉදිරි මස 6 තුළ දී බංග්ලාදේශය ක්‍රීඩා කරන 20යි 20 තරග 5ක් ක්‍රීඩා කිරීමේ අවස්ථාව ටමිම් ඉක්බාල්ට අහිමි වනවා.

තරුණ ක්‍රීඩකයින්ට බෙහෝ දේ ඉගෙන ගැනීම සදහා අත්දැකීම් බහුල ක්‍රීඩකයින් කණ්ඩායම තුළ සිටීම වැදගත් බවයි තේරීම් කමිටු ප්‍රධානී Minhajul Abedin මාධ්‍ය වෙත සදහන් කළේ.

ටමිම් ඉක්බාල් ගත් පෞද්ගලික තීරණයට ගරු කරන නමුත්, එම තීරණය සම්බන්ධයෙන් යළි සලකා බලන ලෙසට ඔහුගෙන් ඉල්ලීමක් සිදු කරන බව හෙතෙම කියා සිටියා.