මේ දිනවල පැවැත්වෙන ආසියානු කුසලාන එක්දින ක්රිකට් තරගාවලියේ සුපිරි 4 වටය යටතේ කොළඹ පැවැත්වීමට නියමිත තරග හා අවසන් මහා තරගය නියමිත පරිදි කොළඹ ආර්. ප්රේමදාස ක්රීඩාංගනයේ දී ම පැවැත්වීමට මේ වන විට ආසියානු ක්රිකට් කවුන්සලයේ යළි අවධානය යොමුව තිබෙනවා.
මීට පෙර ඔවුන් සැලසුම් කළේ කොළඹට ඇද හැලෙන වර්ෂාව සැලකිල්ලට ගනිමින් අදාළ තරග හම්බන්තොට ක්රීඩාංගනයේ පැවැත්වීමටයි.
නමුත්, එම තීරණය තාවකාලිකව අත්හිටුවා එම තරග නියමිත පරිදි කොළඹ දී ම පැවැත්වීම සම්බන්ධයෙන් මේ වන විට අවධානය යොමු කර තිබෙනවා.
කොළඹ ප්රදේශයට බලපෑ වර්ෂාව සහිත අයහපත් කාළගුණ තත්ත්වයේ යම් අඩු වීමක් ද මේ වන විට පෙන්නුම් කර තිබෙනවා.
ඉන්දීය කණ්ඩායම මහනුවර සිට අද(5) දහවල් කොළඹ ටාජ් සමුද්රා හෝටලය වෙත පැමිණි බව ද සදහන්.
වර්ෂාව හේතුවෙන් මහනුවර පල්ලේකැලේ ක්රීඩාංගනයේ දී පසුගිය දෙවැනිදා පැවැති ඉන්දු-පාකිස්තාන තරගය ප්රතිපලයකින් තොරව අවසන් කිරීමට සිදු වුණා. එමෙන්ම ඊයේ(4) පල්ලේකැලේ ක්රීඩාංගනයේ පැවැති ඉන්දු-නේපාල තරගයට ද වර්ෂාවෙන් දැඩි බාධා එල්ල වුණා.
තරගාවලියේ සුපිරි 4 වටයේ තරග ආරම්භ කරමින් පළමු තරගය පමණක් පාකිස්තානයේ ලාහෝර් නුවර දී හෙට පැවැත්වීමට නියමිත අතර, අනතුරුව සුපිරි 4 වටය යටතේ පැවැත්වෙන ඉතිරි තරග 5 හා අවසන් මහා තරගය ශ්රී ලංකාවේ පැවැත්වීමට නියමිතයි.
