දිනේෂ් කාර්තික් හා ශහ්බාස් අහ්මඩ්ගේ සුපිරි සටන්කාමී පිතිහරඹය හමුවේ මෙවර ඉන්දීය ප්රිමියර් ලීග් ක්රිකට් තරගාවලියේ 13 වැනි තරගයෙන් කඩුලු 4ක ජයක් වාර්තා කිරීමට රෝයල් චැලෙන්ජර්ස් බැංගලෝර් කණ්ඩායම අද(5) සමත් වුණා.
මුම්බායි හි වන්කඩේ ක්රීඩාංගනයේ පැවැති තරගයේ දී ඔවුන් හමුවේ පරාජයට පත් වූයේ කුමාර් සංගක්කාර පුහුණුකාරීත්වය දරන රාජස්ථාන් රෝයල්ස් කණ්ඩායමයි.
තරගයේ කාසියේ වාසිය දිනූ බැංගලෝර් කණ්ඩායමේ ආරාධනයෙන් පළමුව පන්දුවට පහරදුන් රාජස්ථාන් රෝයල්ස් කණ්ඩායම නියමිත පන්දුවාර 20 අවසානයේ කඩුලු 3ක් දැවී ලකුණු 169ක් රැස් කළා.
ජොස් බට්ලර් පන්දු 47කින් නොදැවී ලකුණු 70ක් ලබා ගත්තා. ඔහුගේ ඉනිමට කිසිදු හතරේ පහරක් ඇතුළත් නොවූ අතර, හයේ පහර 6කින් බට්ලර්ගේ ඉනිම වර්ණවත් වුණා.
දෙව්දත් පඩික්කල් ලකුණු 37(29)ක් හා ශිම්රන් හෙට්මයර් නොදැවී ලකුණු 42(31)ක් රැස් කිරීමට සමත් වුණා.
පන්දු යැවීමේ දී ඩේවිඩ් විලී, වනිදු හසරංග හා හර්ෂාල් පටෙල් එක් කඩුල්ල බැගින් බිද හෙලුවා.
පිළිතුරු ඉනිම ක්රීඩා කළ රෝයල් චැලෙන්ජර්ස් කණ්ඩායම පන්දුවාර 19.1ක් අවසානයේ කඩුලු 6ක් දැවී ජයග්රාහී ඉලක්කය පසු කළා.(173/6)
ෆෆ් ඩු ප්ලෙසිස් ලකුණු 29ක් හා අනුජ් රාවත් ලකුණු 26ක් ලබා ගනිමින් ඉනිමට සාර්ථක ආරම්භයක් ලබා දුන්නේ පළමු කඩුල්ලට ලකුණු 55ක සබදතාවයක් ද පිහිටුවමින්.
කෙසේ වෙතත්, අනතුරුව ලකුණු 7ක් තුළ ඉනිමේ පළමු කඩුලු 4ම දැවී යාමත් සමග තරගයේ පාලනය රාජස්ථාන් රෝයල්ස් කණ්ඩායමට නතු වුණා. ලකුණු 87ක්ව තිබියදී ඔවුන්ගේ 5 වැනි කඩුල්ල ද බිද වැටුණා.
එවැනි පසුබිමක පිටියේ එක් වූ ශහ්බාස් අහ්මඩ් හා දිනේෂ් කාර්තික් 6 වැනි කඩුල්ලට පන්දු 33කින් වේගවත් ලකුණු 67ක් එක් කිරීමට සමත් වුණේ තරගයේ සම්පූර්ණ පාලනය බැංගලෝර් කණ්ඩායමට හිමි කර දෙමින්.
ශහ්බාස් ලකුණු 45ක් රැස් කළේ පන්දු 26ක් පමණක් වැය කරමින්. කාර්තික් පන්දු 23කින් නොදැවී ලකුණු 44ක් ලබා ගනිමින් සිය කණ්ඩායම ජයග්රහනය කරා රැගෙන ගියා.
පන්දු යැවීමේ දී ට්රෙන්ට් බෝල්ට් හා යුස්වේන්ද්ර චහල් කඩුලු 2 බැගින් බිද හෙලුවා.
— cric fun (@cric12222) April 6, 2022
